ABŞ Federal Ehtiyatlar Sisteminin faiz dərəcələrini aşağı salmağa başlaya biləcəyi ehtimallarının getdikcə güclənməsi fonunda çərşənbə axşamı ABŞ dolları əksər major valyutalar qarşısında ucuzlaşıb. Yaponiya Bankının “ultra yumşaq” pul-kredit siyasətini davam etdirmək qərarından sonra dollar qarşısında mövqeyini qoruya bilməyən Yapon yeni isə istisna olaraq qalır.
FED rəsmiləri, 2024-cü ildə mümkün faiz endirimlərinə dair mesajlar verən Federal Açıq Bazar Komitəsinin keçən həftə keçirilən iclasından sonra bazar proqnozlarını yönləndirməyə çalışırlar. FED-in mart iclasında uçot dərəcəsinin endirilməsi ehtimalı 67.5% səviyyəsində qiymətləndirir və bu ehtimallar isə maliyyə bazarlarında dollara tələbin kəskin azalmasına səbəb olub.
Hazırda investorları düşündürən əsas məqam Federal Ehtiyatlar Sisteminin bu proqnozlara uyub uymayacağıdır. Bu isə, potensial olaraq bazarda ciddi burulğunlara səbəb ola bilər.
Atlanta FED-in sədri Rafael Bostic ilin ikinci yarısında iki faiz endirimi ilə bağlı proqnozunu təkrarlayıb, lakin tələsməyə ehtiyac olmadığını vurğulayıb. Eyni zamanda, Riçmond FED-in sədri Tomas Barkin isə bildirib ki, mərkəzi bankın faiz dərəcələrini aşağı sala bilməsi iqtisadiyyatın gedişindən asılı olacaq.
Dollar indeksi 102.20 bənd səviyyəsində qərarlaşıb. Qeyd edək ki, indeks ötən həftə 101.76 bəndlik göstərici ilə son dörd ayın ən aşağı səviyyəsinə çatıb.
Analitiklər həmçinin qeyd ediblər ki, gələcək iqtisadi məlumatlar dolların istiqamətinin müəyyən edilməsində həlledici rol oynayacaq, çünki bu məlumatlar gələn il üçün proqnozlaşdırılan faiz endirimlərinin əsaslı olub-olmaması barədə ipucları verəcəklər.
İnvestorlar bu həftənin cümə günü FED-in üstünlük verdiyi inflyasiya göstəricisi olan Baza Şəxsi İstehlak Xərcləri (PCE) Qiymət İndeksinin açıqlanmasını gözləyirlər. Bu göstərici inflyasiyanın gələn il monetar siyasətin yumşaldılmasını təmin edəcək qədər yavaşlayıb-yavaşlamamasına işıq tuta bilər.
Yaponiya Mərkəzi Bankının sədri Kazuo Uedanın yaxın gələcəkdə mənfi faiz dərəcələrindən imtina etməyi düşünmədiklərini vurğulayan şərhlərindən sonra Yapon yeni zəifləyib və dollara qarşı 143.78 yen səviyyəsində ticarət edilib. Analitiklərin fikirlərinə görə, aprel ayına qədər Yaponiyanın monetar siyasətində hər hansı bir dəyişikliyinin olmayacağı ehtimal edilir.
Avro dollar qarşısında gücünü qoruyub 1.0970$-dan ticarət edildiyi halda, dolların zəifliyindən bəhrələnərək çərşənbə axşamı Britaniya funt-sterlinqi də bahalaşaraq günlük şamını 1.2720$ hədlərində tamamlayıb.
Bugün isə, İngiltərən İstehlak Qiymətləri İndeksi, İstehsal Qiymətləri İndeksi, Almaniyada İstehsal Qiymətləri İndeksi və Amerikada “Conference Board” İstehlakçıların Güvən İndeksi kimi önəmli iqtisadi göstəricilər valyuta birjalarında tendensiyaların formalaşmasına ciddi təsir edə bilər.
Məlumat InvestAZ İnvestisiya Şirkətinin analitikləri tərəfindən hazırlanıb.
Beynəlxalq birjalarda və Azərbaycanda istiqraz, səhm və digər investisiya alətləri ilə əməliyyatları InvestAZ investisiya şirkəti vasitəsilə həyata keçirmək mümkündür.
