ABŞ prezidenti Donald Tramp tərəfindən tətbiq edilən qlobal tariflərin qanunsuz hesab edilməsi və Federal Ticarət Məhkəməsi tərəfindən bloklanması fonunda dollar major valyutalar qarşısında kəskin şəkildə bahalaşdı. EUR/USD valyuta cütlüyü 1.12970 səviyyəsindən 1.12100 səviyyəsinə qədər geriləyib. Eyni dövr ərzində GBP/USD məzənnəsi 1.34700 həddindən 1.34150 həddinə kimi ucuzlaşıb. Qızıl dolların bahalaşması ilə zəifləyib və 20 may tarixindən etibarək ilk dəfə 3245$ səviyyəsinə qədər enib.
Verilən məlumata əsasən, Nyu-Yorkda yerləşən ABŞ-ın Beynəlxalq Ticarət Məhkəməsinin üç hakimdən ibarət heyəti tariflərin qanunsuz olması qərarını qəbul edib və bu qərarla Trampın fövqəladə vəziyyət qanununu haqsız şəkildə tarifləri əsaslandırmaq üçün tətbiq etdiyini bildirən bir sıra iddiaları dəstəkləyib.
Ekspertlər qeyd edir ki, Tramp "ABŞ-ın ticarət siyasətini öz istəklərinə tabe edib". Onlar vurğulayır ki, prezident "tariflərdən danışıqlarda təzyiq vasitəsi kimi istifadə edərək digər ölkələri ABŞ üçün sərfəli sazişlər imzalamağa məcbur etməyə çalışır və əgər şərtlər onu qane etməzsə, sadəcə tariflər tətbiq edəcəyini bildirir.
Ötən gün Federal Açıq Bazar Komitəsinin (FOMC) dərc olunmuş hesabatında, Federal Ehtiyatlar Sisteminin (FED) numayəndələri inflyasiyanın işsizliklə paralel olaraq artmağa davam edəcəyi təqdirdə, çətin seçim qarşısında qala biləcəklərini qeyd ediblər. Belə vəziyyətdə onlar prioritetləri müəyyənləşdirərək qərar verməli olacaqlar — yüksək inflyasiyaya qarşı mübarizə aparmaq üçün faiz dərəcələrini artırmaq, yoxsa maksimum məşğulluğu təmin etmək və iqtisadi artımı stimullaşdırmaq üçün onları azaltmaq. Eyni zamanda, iclas iştirakçıları razılaşıblar ki, hazırda ABŞ-da iqtisadi artım və əmək bazarı davamlılıq nümayiş etdirir, baxmayaraq ki, gələcəyə dair proqnoz daha qeyri-müəyyən olub.
“Brent” markalı neftin bir barel üçün qiyməti ticarət gününün əvvəlində kəskin olaraq bahalaşıb. Ötən gün tiarət sessiyasını 64.25$ səviyyəsində bitirən “qara qızıl”, bugün 65$-dan ticarət olunmağa başlayıb və 65.20$-a qədər də bahalaşıb. Amerika Neft İnstitutunun (API) açıqlamasına görə, ABŞ-da ötən həftə kommersiya məqsədli xam neft ehtiyatları 4.24 milyon barel azalıb. Bir həftə əvvəl isə qeyd olunan göstərici 2.5 milyon barel artmışdı.
“OPEC+” ölkələrinin nazirləri isə 39-cu görüşdə daha əvvəl qəbul edilmiş qərarları, o cümlədən 2026-cı ilin sonuna qədər olan neft hasilatı səviyyələri ilə bağlı razılaşmaları təsdiqləyiblər. Şənbə günü isə gündəlik 2.2 milyon barrel həcmində könüllü hasilat azaldılmasına razılaşmış səkkiz “OPEC+” ölkəsinin nazirlərinin ayrıca görüşü baş tutacaq. Bu görüşdə iyul ayında ardıcıl üçüncü dəfə hasilatın 411 min barrel artırılması imkanının müzakirə olunacağı gözlənilir.
Bugün bazar iştirakçılarının diqqət mərkəzində ABŞ-da açıqlanacaq ÜDM olacaq. Həmçinin, Amerikada İşsizlik Müavinəti üçün Müraciətlərin Sayı və Şəxsi Xərclərin Qiymət İndeksi göstəriciləri investorlar tərəfindən maraqla gözlənilən xəbərlərdir.
Məlumat İnvest-AZ İnvestisiya Şirkətinin analitikləri tərəfindən hazırlanıb.
