Bugün ABŞ-da Qeyri-kənd Təsərrüfatı Sektorunda Yeni Yaranan İş Yerlərinin Sayı (NFP) göstəricisinin dərc olunması ərəfəsində dollar major valyutalar qarşısında bir qədər geriləyib. EURUSD cütlüyü ötən gün 1.12660 səviyyəsinə qədər ucuzlaşdıqdan sonra, bugün səhər saatlarında 1.13150 səviyyəsinə qədər bahalaşıb. Eyni dövr ərzində GBPUSD cütlüyü 1.32600 həddindən 1.33190 həddinə qədər artım göstərib. Qızıl isə itirdiyi mövqelərinin bir qismini bərpa edə bilib. Dəyərli metal 3200$-dan 3258$-a qədər bahalaşıb.
ABŞ-ın Təchizatların İdarə Edilməsi İnstitutunun (ISM) açıqlamasına əsasən, ölkənin Sənaye Sektorunda Biznes Aktivliyi İndeksi (ISM Manufacturing) 2025-ci ilin aprel ayında 48.7 bəndə enib və mart ayında qeydə alınmış 49 bəndlik göstəricinin altında qalıb. Analitiklər göstəricinin daha da azalaraq 48 bəndə qədər zəifləyəcəyini proqnozlaşdırmışdılar. Həmçinin, ötən həftə ərzində işsizlik müavinəti üçün müraciət edənlərin sayı 18 min nəfər artaraq 241 minə çatıb. Yenilənmiş məlumatlara əsasən, bir əvvəlki həftədə bu göstərici əvvəl qeyd olunduğu 222 min deyil, 223 min olub.
Əlavə olaraq, Amerika birja indeksləri cümə axşamı günü yüksəlib — buna böyük şirkətlərin müsbət rüblük hesabatları səbəb olub. “Microsoft Corp.” şirkətinin səhmlərinin qiyməti 7.6% artıb. Şirkət 2025-ci maliyyə ilinin üçüncü rübü üzrə (yanvar-mart dövrü) bir səhmə düşən xalis mənfəətini 3.46$ səviyyəsində açıqlayıb.
Bazar iştirakçıları bugün açıqlanacaq NFP xəbərini diqqətlə izləyəcəklər. Analitiklər aprel ayında 138 min yeni iş yerinin yaradıldığını proqnoz edirlər. Həmçinin, bugün Almaniyada Sənaye Sektorunda Biznes Aktivliyi İndeksi (PMI), Avrozonada İstehlak Qiymətləri İndeksi, İşsizlik Səviyyəsi və sənaye sektorunda PMI, ABŞ-da isə Orta Saatlıq Əmək Haqqı, İşsizlik Səviyyəsi və Sənaye Sektorunda Sifarişlərin Həcmi göstəriciləri dərc olunacaq.
Məlumat İnvest-AZ İnvestisiya Şirkətinin analitikləri tərəfindən hazırlanıb.
