Dünən ABŞ-da statistik məlumatların dərc olunması fonunda dollar major valyutalar qarşısında bahalaşmağa davam edib.
EUR/USD valyuta cütlüyü 1.14390 səviyyəsindən 1.13100 səviyyəsinə qədər ucuzlaşıb. Eyni dövr ərzində GBPUSD cütlüyü 1.33380 həddindən 1.32470 həddinə qədər enib. USD/JPY cütlüyündə isə məzənnə 143.580 səviyyəsinə qədər bahalaşıb.
Qızıl eniş tendensiyasını dayandıraraq 3260$-dan 3368$-a qədər yüksəlib. Beynəlxalq birjalarda “Brent” markalı neftin isə bir barel üçün qiyməti 65.30$-a ticarət olunur.
Ötən gün açıqlanan məlumatlara əsasən, ABŞ-ın Sənaye Sektorunda Biznes Aktivliyi İndeksi (PMI) mart ayı ilə müqayisədə aprel ayında 50.2 bənd səviyyəsindən 50.7 bənd səviyyəsinə qədər artıb. Analitiklər göstəricinin 49 bənd səviyyəsinə qədər zəifləyəcəyini proqnozlaşdırmışdılar. Həmçinin, ölkənin xidmət sektorunda PMI-ın aprel ayında 54.4 bənddən 52.8 bəndədək enəcəyi ehtimal olunsa da, göstərici proqnozların altında, 51.4 bənd səviyyəsində açıqlanıb.
Əlavə olaraq, ABŞ-ın Ticarət Nazirliyinin hesabatına əsasən, ölkədə mart ayında yeni təkailəli evlərin satışı əvvəlki ay ilə müqayisədə 7.4% artaraq illik ifadədə 724 min təşkil edib. Fevral ayı üzrə göstərici isə 676 mindən 674 minə yenilənib. Analitiklər mart ayında satılan yeni evlərin sayının illik ifadədə 682 min olacağını ehtimal etmişdilər. 2024-cü ilin mart ayı ilə müqayisədə isə yeni evlərin satışları 6.0% artıb. Amerikada Tikinti üzrə İcazələrin Sayı isə fevral ayı ilə müqayisədə mart ayında 0.5% artaraq 1.467 milyon təşkil edib.
Eləcə də, Avrozonanın Sənaye Sektorunda Biznes Aktivliyi İndeksi mart ayı ilə müqayisədə aprel ayında 48.6 bənd səviyyəsindən 48.7 bənd səviyyəsinə qədər yüksəlib. Xidmət sektorunda PMI-ın 51 bənddən 50.4 bəndədək zəifləyəcəyi proqnoz olunsa da, göstərici 49.7 bəndədək geriləyib. Avropanın ən böyük iqtisadiyyatı olan Almaniyanın sənaye sektorunda aktivlik aprel ayında 48.3 bənddən 48 bəndədək enib və analitiklərin 47.5 bəndlik proqnozunun üzərində açıqlanıb. Ölkənin Xidmət Sektorunda Biznes Aktivliyi İndeksi 50.9 bənd səviyyəsindən 48.8 bənd səviyyəsinədək zəifləyib.
Bugün Bakı vaxtı ilə saat 16:30-da ABŞ-da dərc olunacaq İşsizlik Müavinəti üçün Müraciətlərin Sayı investorların marağına səbəb olacaq əsas xəbərlərdən biridir. Həmçinin, Almaniyada açıqlanacaq Biznes Mühiti İndeksi və ABŞ-da dərc olunacaq Uzunmüddətli İstifadə Məhsulları üzrə Sifarişlərin Həcmi və Təkrar Mənzil Bazarında Satışların Həcmi göstəriciləri bazar iştirakçılarının diqqət mərkəzində olacaq.
Məlumat İnvest-AZ İnvestisiya Şirkətinin analitikləri tərəfindən hazırlanıb.
