Dünən inflyasiyaya dair məlumatların proqnozların altında dərc olunması və Trampın tarif siyasıtinin beynəlxalq münasibətləri gərginləşdirməyə davam etməsi fonunda dolların major valyutalar qarşısında ucuzlaşması tendensiyası davam edib.
Belə ki, EUR/USD valyuta cütlüyü ötən gün 1.09410 səviyyəsindən bahalaşıb və bugün səhər 1.13830 səviyyəsinə qədər artım göstərib. Bu 2022-ci ilin fevral ayından bəri ən yüksək həddir. USD/JPY cütlüyü eyni dövr ərzində 2024-ci ilin oktyabr ayından bu yana ilk dəfə 142.880 səviyyəsinə qədər ucuzlaşıb. EUR/GBP cütlüyü isə 2009-cu ilin iyun ayından bəri ən yüksək səviyyəyə, 0.87250 həddinə qədər qalxıb.
Dolların ucuzlaşması investorların “güvənli liman” maliyyə aləti olaraq qızıla olan marağını artırıb və dəyərli metal tarixində ilk dəfə 3220$ səviyyəsinə qədər bahalaşıb. “Brent” markalı neftin qiyməti isə 63$ həddinin üzərində möhkəmlənməyə çalışır. Hazırda “qara qızıl” beynəlxalq birjalarda 63.50$-a ticarət olunur. “Bitcoin”-in qiyməti isə son iki gündə 80000$ səviyyəsinin altına düşüb.
Ötən gün ABŞ-ın Əmək Nazirliyinin verdiyi məlumatlara əsasən, mart ayında ölkədə İstehlak Qiymətləri İndeksi (CPI) illik ifadədə 2.4% artıb. Qiymət artımı fevral ayında dərc olunan 2.8%-lik göstəriciyə nisbətən zəifləyib. Aylıq ifadədə CPI indeksi fevral ayı ilə müqayisədə mart ayında 0.1% azalıb. Bu, 2020-ci ilin may ayından bəri, göstəricidə müşahidə olunan ilk azalmadır. Ölkədə baza inflyasiya indeksi (Core CPI) mart ayında fevral ilə müqayisədə 0.1%, illik ifadədə isə 2.8% artıb.
Həmçinin, dünən ABŞ-da işsizlik müavinəti üçün müraciət edən amerikalıların sayı ötən həftə 4 min nəfər artaraq 223 min nəfərə çatıb. Martın 29-da başa çatan həftə üzrə işsizlik müavinəti almaqda davam edən amerikalıların sayı 1.893 milyon nəfərdən 1.85 milyon nəfərə qədər azalıb. Kanadada isə fevral ayı üçün Tikinti üzrə İcazələri Sayı 2.9% artıb.
Bugün Bakı vaxtı ilə saat 16:30-da ABŞ-da dərc olunacaq İstehsal Qiymətləri İndeksi (PPI) investorların diqqət mərkəzində olacaq əsas xəbərdir. Eləcə də, Almaniyada açıqlanacaq İstehsal Qiymətləri İndeksi, Böyük Britaniyada dərc olunacaq Tİcarət Saldosu, ÜDM və Sənaye Sektorunda İstehsal Həcmi və Türkiyədə açıqlanacaq Pərakəndə Satış Dövriyyəsinin Həcmi göstəriciləri də bazar iştirakçıları maraqla gözlənilir.
Məlumat İnvest-AZ İnvestisiya Şirkətinin analitikləri tərəfindən hazırlanıb.
