FED-in növbəti həftə baş tutacaq iyun toplantısında FOMC-un uçot dərəcəsini artırmayacağı ehtimallarınını 74-75% səviyyəsini keçməsi fonunda dollar indeksində yüksəliş tendensiyası bir qədər səngiyib.
Eyni zamanda analitiklər hesab edirlər ki, FED iyul toplantısında uçot dərəcəsini 25 baza bəndi artacaq və bu artımla çatılacaq 5.25-5.50% səviyyəsi faiz artımı dövrünün ən pik həddi olacaq.
Sərt monetar siyasətin təsirlərinin iqtisadiyyata təsirləri hiss edilmçəyə başladıqca dollar üzərində təzyiqlər daha da arta bilər.
Makroiqtisadi göstəricilərə gəldikdə isə ABŞ-ın texnologiya nəhənglərindən olan “Microsoft”un səhmlərinin 3%, “Amazon”un səhmlərinin 4.2%, “Alphabet”in səhmlərinin isə 3.8% ucuzlaşması diqqət çəkib.
Açıqlanan məlumatlara görə, ABŞ-ın xarici ticarət kəsiri aprel ayında aylıq müqatyisədə 23% artaraq 74.6 milyard dollarla son 6 ayın ən yüksək səviyyəsinə çatıb.
ABŞ-da 30 illik ipoteka (mənzil krediti) üzrə orta faiz dərəcəsi keçən həftə 6.81%-ə enərək, son 4 həftə ərzində ilk dəfə azalıb.
Ölkədə istehlak kreditləri aprel ayında əvvəlki aya görə proqnozlaşdırılandan daha çox, 23 milyard dollar artaraq 4.86 trilyon dollar həcmə çatıb.
Bu gün isə Avrozonada açıqlanacaq Ümumdaxili Məhsulun Həcmi və Amerikada dərc olunacaq ilk dəfə işsizlik müavinatı üçün müraciət edənlərin sayına dair statistik rəqəmlər investorların diqqət mərkəzində olacaq.
Dünən ticarət gününün sonlarına doğru dollar indeksi yenidən 103.64 səviyyəsinə qədər geriləsə də, buradan dəstək görərək 104 bənd hədlərinin üzərinə yüksəlib. DXY 103.50 bənd həddindəki psixoloji baryerin üzərində qaldığı müddətcə, artım tendensiyası 105 və 108 bənd hədlərinə kimi davam edə bilər.
Çərşənbə günü qızılın qiyməti 1969$-a kimi bahalaşsa da burada müqavimətlə rastalaşaraq kəskin ucuzlaşdı. Hazırda 1946$-dan təklif edilən qiymətli metalın bir unsiya üzrə dəyəri 1941$-ın altına düşsə, eniş tendensiyası 1933$ və 1920$-a kimi davam edə bilər.
Məlumat İnvest-AZ İnvestisiya Şirkətinin analitikləri tərəfindən hazırlanıb.
Beynəlxalq birjalarda və Azərbaycanda istiqraz, səhm və digər investisiya alətləri ilə əməliyyatları InvestAZ investisiya şirkəti vasitəsilə həyata keçirmək mümkündür.
