Ötən həftə ABŞ Federal Ehtiyyatlar Sistemi, Avropa və İngiltərə Mərkəzi Bankları və İsveçrə Milli Bankının faiz artımlarından sonra dollar dünya birjalarında major valyutalar qarşısında bahalaşıb.
Faiz artımlarından sonra birja iştirakçılarının diqqətləri mərkəzi bankların monetar siyasətin gələcəyi ilə bağlı planlarına yönəlib. Bu səbəbdən də rəsmilərin pul-kredit siyasətinin yol xəritəsinə dair verəcəkləri mesajlar birjlarda gələcək tendensiyaları formalaşdıra bilər.
103.50 səviyyəsindən dəstək alan dollar indeksi (DXY) hazırda 104 bənd hədlərinin üzərində möhkəmlənməyə çalışır. “Buğa”lar buna müəssər olsa və DXY-ı 106 bənd həddinin üzərinə qaytara bilsələr, artım tendensiyası 110 və 113 bənd hədlərinə qədər davam edə bilər.
Bu həftənin cümə axşamı Amerikada dərc olunacaq ÜDM göstəriciləri artımla açıqlanarsa, dolların dünya birjalarında qiymətlərinə dəstək ola bilər.
EUR
Mərkəzi bankların faiz qərarları fonunda 1.07$ hədlərinə qədər bahalaşan EUR/USD cütlüyü FED sədri Jerom Pavelin sərt monetar siyasətin davam etdiriləcəyinə dair mesajlarından sonra yenidən 1.06$ səviyyəsinin altına düşüb. Təhlillərə əsasən dollar indeksi 106 bənd həddinin üzərində möhkəmlənə bilsə, EUR/USD və GBP/USD cütlüklərində eniş tendensiyası daha da güclənə bilər.
Bu həftə Almaniyada “İFO” Biznes Aktivliyi İndeksi kimi vacib iqtisadi göstəricilər investorların diqqət mərkəzində olacaq.
GBP
Bu həftə İngiltərədə açıqlanacaq iqtisadi inkişaf səviyyəsinə dair rəqəmlər GBP/USD cütlüyündə trendin gələcək taleyinə dair bir çox suallara aydınlıq gətirə bilər.
TRY
Son 3 ayda üfüqi tendensiya sərgiləyən USD/TRY məzənnəsi 18.65TL həddi üzərində möhkəmlənərsə, lirə dollar qarşısında 19TL-yə kimi ucuzlaşa bilər. Cümə axşamı Türkiyə Cümhuriyyəti Mərkəzi Bankının faiz qərarı USD/TRY cütlüyündə tendensiyanın gedişinə ciddi təsir edə bilər.
GOLD
FED sədri Jerom Pavelin sərt monetar siyasətin davam etdiriləcəyinə dair mesajlarından sonra dolların bahalaşacağına dair yaranan ehtimallar fonunda qızıl həftəni 1792$-da tamamladı. Dollar indeksində artım tendensiyası davam edərsə və 1790$ həddindəki dəstək səviyyəsi qırılarsa, qiymətli metalın bir unsiya üzrə dəyəri 1739$ və 1720$-a kimi ucuzlaşa bilər.
Məlumat “İnvest-AZ İnvestisiya Şirkəti” QSC-nin Analitika Departamenti tərəfindən hazırlanıb.
