2025-ci ilin ilk yeddi ayı Azərbaycanın kapital bazarı üçün yüksək aktivlik və eyni zamanda, aydın şəkildə formalaşmış bazar strukturu ilə yadda qalıb.
FED.az xəbər verir ki, investisiya şirkətlərinin birja əməliyyatlarının ümumi dövriyyəsi bu dövr ərzində 58 milyard manatı ötüb . Bazarın 81%-dən çoxu cəmi iki şirkətin – “PAŞA Kapital” və “ABB İnvest”in payına düşür ki, bu da bazarın yüksək konsentrasiyalı bir duopoliya modelinə yaxınlaşdığını göstərir.
Reytinq cədvəlinin zirvəsində qərarlaşan "PAŞA Kapital İnvestisiya Şirkəti" QSC, təkbaşına 26.6 milyard manatlıq dövriyyə həyata keçirərək bazarın mütləq lideri statusunu təsdiqləyib. Bu göstərici təkcə bir şirkət üçün deyil, bütün bazar üçün meyar müəyyən edən bir həcmdir. Ondan cüzi fərqlə geri qalan "ABB İnvest İnvestisiya Şirkəti" QSC isə 20.9 milyard manatlıq dövriyyə ilə ikinci pillədə möhkəmlənib.
Bu iki “ağırçəkili oyunçu”nun birlikdə yaratdığı dövriyyə 47.5 milyard manat təşkil edir. Bu, o deməkdir ki, bazarda reallaşan hər 100 manatlıq əməliyyatın 81 manatdan çoxu məhz bu iki şirkətin vasitəçiliyi ilə baş tutub.
Liderlərin yaratdığı nəhəng kölgənin altında isə öz aralarında gərgin rəqabət aparan və hər biri milyard manatlıq həddi keçən investisiya şirkətlərindən ibarət ikinci bir qrup formalaşıb. Bu qrupda Assist Finance İnvestisiya Şirkəti ASC (3 milyard AZN) və "CPM-İnvest İnvestisiya Şirkəti" QSC (2.6 milyard AZN) önə çıxır. Onları "Xalq Kapital" (1.8 milyard AZN), "Invest-Az" (1.4 milyard AZN) və "Unicapital" (1.3 milyard AZN) izləyir.
Bu beş şirkətin ümumi dövriyyəsi təxminən 10 milyard manat təşkil etsə də, onların hər birinin ayrı-ayrılıqda bazar payı liderlərlə müqayisə olunmayacaq dərəcədə azdır. Buna baxmayaraq, bu şirkətlər bazarın dərinliyini təmin edir, müxtəlif müştəri seqmentlərinə xidmət göstərərək rəqabət mühitini qoruyur və bazarın yalnız iki oyunçudan ibarət olmadığını sübut edirlər.
Reytinqin növbəti pillələrində qərarlaşan şirkətlər Capital Partners (783 milyon AZN) və Troni İnvestisiya Şirkəti (432 milyon AZN) orta göstərcilərlə diqqəti cəlb edir. "CFI Financial", "PSG Kapital" və MFX Trading isə 140-200 milyon manat aralığında dövriyyə ilə yer tuturlar.
