Ötən həftə ABŞ-da inflyasiya göstəriciləri gözləntilərin altında qaldıqdan sonra dollar indeksində və istiqraz gəlirlərində sürətli geriləmə müşahidə olunub.
EUR/USD son üç ayın ən yüksək səviyyəsinə çatıb. Bu gün dollar indikatoru 107-nin altında qərarlaşarkən, ABŞ-ın 10 illik dövlət istiqrazlarının gəlirlilik faizi də 4%-in altına düşüb. Təhlillərə səasən dollar indeksi üzərində təzyiqlər artmaqda davam edərsə, EUR/USD məzənnəsi 1.05 hədlərinə kimi bahalaşa bilər.
Bu gün Bakı vaxtı ilə saat 11:00-da İngiltərədə açıqlanacaq əmək bazarı, saat 14:00-da Avrozonada dərc olunacaq ÜDM, həmçinin 17:30-da Amerikadan gələcək İstehsal Qiymətləri İndeksi kimi önəmli iqtisadi gödtəricilər investorların diqqət mərkəzində olacaq.
Ucuzlaşan dollar fonunda qızıl 1770$-ın üzərinə yüksəlib. Təhlillərə əsasən qiymətli metalın bir unsiya üzrə dəyəri, 1773$ həddinin üzərində möhkəmlənə bilsə, 1790$-a kimi bahalaşa bilər.
“OPEC”-in noyabr ayı üzrə aylıq “Neft Bazarı Hesabatı”na əsasən 2022-ci ildə qlobal neft tələbatının artımı ilə bağlı proqnozlar sutkada 0.1 milyon barel azaldılaraq 2.5 milyon barelə endirilib. “OPEC” həmçinin 2023-cü il üçün olan neftə tələbat artımı proqnozunu da sutkada 0.1 milyon barel azaldaraq 2.2 milyon barelə endirib. Nəticədə Beynəlxalq enerji birjalarında neftin qiymətləri yenidən 94$-a kimi ucuzlaşıb. Hazırda 93.84$-dan təklif olunan “Brent” markalı neftin bir barel üzrə qiyməti 91.60$-a kimi ucuzlaşa bilər.
Məlumat Azərbaycanın İnvestAZ İnvestisiya şirkətinin analitikləri tərəfindən hazırlanıb.
