ABŞ Konqresinin Nümayəndələr Palatasının bir qrup üzvü amerikalı qanunvericilərə səhm alverini qadağan edən qanun layihəsi hazırlayıb.
FED.az xəbər verir ki, bu barədə «The Wall Street Journal» məlumat yayıb. Qəzetin mənbələri bildirib ki, qanun layihəsi gələn həftə təqdim olunacaq.
Bu qanun qəbul olunsa, Konqres üzvlərinə və onların ailələrinə fərdi səhmlərini, o cümlədən qiymətli kağızların sahibinin onlara birbaşa nəzarət etmədiyi “kor” trestlərdəki səhmləri satmaq üçün 180 gün vaxt verəcək.
Ggələcəkdə konqresə seçiləcək yeni konqres üzvlərinin isə vəzifəyə gəldikdən sonra indiyədək əllərində olan səhmlərini satmaq üçün 90 gün vaxtı olacaq.
Əgər onlar tələblərə əməl edib səhmlərini satmasalar, Konqres üzvləri investisiyalarının dəyərinin 10%-i məbləğində cərimə olunacaq və qiymətli kağızlardan dividend almaqdan məhrum ediləcəklər.
Xatırladaq ki, bu məsələ ABŞ-da artıq bir dəfə qalxıb. Avqustun ortalarında ABŞ-ın maliyyə naziri Skott Bessent qeyd edib ki, Konqres üzvlərinin birjada ticarət etməsi, yəni birja ticarəti ilə məşğul olması, bütün konqresə etibarı şübhə altına alır.
Bessent həmçinin qeyd edib ki, birja ticarəti qanunvericilərə son dərəcə yüksək gəlir gətirir və bu, "hər hansı bir hedcinq fondunun həsəd aparacağı" dərəcədədir.
Fox News-un məlumatına görə, Konqresin 120 üzvü 2024-cü ildə 9400-dən çox birja ticarəti həyata keçirib, fərdi qanunvericilər gəlirlərinin 70%-dən çoxunu məhz səhm ticarətindən qazanıblar.
