Bitkoin bazarı çökür. FED.az xəbər verir ki, dünyanın kriptovalyuta bazarında kəskin ucuzlaşma baş verir.
Ötən gün bitkoinin qiyməti növbəti dəfə ucuzlaşıb. Ötən gün 4268 dollara satılan bitkoin 700 dollara yaxın ucuzlaşaraq 3593 dollara düşüb.
Təkcə son 7 gündə bitkoinin qiyməti 2 min dollar və ya 36% ucuzlaşaraq 5605 dollardan 3593 dollara enib.
Son bir ayda isə bitkoin 1,8 dəfə ucuzlaşıb, halbuki bir ay əvvəl 6475 dollara satılırdı. Ümumilikdə son bir ildə bitkoin 5,4 dəfə ucuzlaşıb.
Vaxtilə 19-20 min dollara atılan və ətrafında böyük ajiotaj olan bitkoinin sahibləri indi ondan sürətlə yaxa qurtarmağa çalışırlar.
Bitkoinin qiyməti ilə yanaşı, onun bazar həcmi də azalmaqdadır. Vaxtilə 324 milyard dollarlıq ümumi dyərə malik olan bitkoin bazarı indi cəmi 66 milyard dollara düşüb.
Ucuzlaşan təkcə bitkoin deyil, təkcə ötən gün, bir sutka ərzində dünyanın 100 ən böyük bazar dəyərinə malik olan kriptovalyutalarının 94-ü ücüzlaşıb, cəmi 6-sının qiyməti qalxıb, artım cəmi 1-2% olub. Enmələr isə daha ciddidir.
Belə ki, 12 kriptovalyuta 18-20% dəyər itirib, 17 kpiptovalyuta isə 15-17% ucuzlaşıb. 48 kriptovalyuta isə 10-15% dəyər itirib.
