Xəbər verildiyi kimi, bank sektorunun aparıcı banklarından olan «Unibank» bu gün ipoteka kreditləri üzrə faiz dərəcəsini 1% aşağı endirib.
Belə ki, bank dövlət xətti ilə, yəni İpoteka və Kredit Zəmanəti Fondunun xətti ilə verilən kreditlərin faiz dərəcəsini 8%-dən 7%-ə endirib.
«Aprelin 30-dək davam edən kampaniya çərçivəsində müraciət edən şəxslər, ipoteka kreditini 1% daha aşağı faizlə əldə edəcəklər. Bu kampaniya həm müştərilərin aylıq ödənişlərinin, həm də faiz ödənişlərinin azalmasına imkan yaradır»-deyə bankın bu barədə açıqlamasında bidirilir.
Qeyd edək ki, bu faiz endirimi doğrudan da ipoteka krediti ilə mənzil və ya ev almaq istəyənlərə xeyli vəsaitə qənaət etməyə imkan yaradır.
Belə ki, FED.az-ın hesablamasına görə, qiyməti 100 min manat olan mənzil və ya evin ipoteka krediti vasitəsilə alışı zamanı müştəri bu faiz endirimi sayəsində ümumilikdə 10 min manata qənaət edə bilər.
Belə ki, qiyməti 100 min manat olan mənzil və ya evin alışı zamanı təqribən 30 min manat ilkin ödəniş tələb olunur, kredit kimi götürülən məbləğ 70 min manat təşkil edir.
Bu vəsaiti illik 8%-lə 20 illik kreditlə götürəndə aylıq ödəniş 585 manat, kreditin qaytarılması üçün ödənilən ümumi vəsait 140,5 min manat təşkil edir.
Bu vəsaiti illik 7%-lə 20 illik kreditlə götürəndə aylıq ödəniş 542 manat, kreditin qaytarılması üçün ödənilən ümumi vəsait 130,3 min manat təşkil edir.
Başqa sözlə, «Unibank»ın faiz dərəcəsinin 1% endirməsi ev alışında ödənişlərdə 10 min manatdan airtıq qənaətə imkan verir.
