"Nikoyl Bank" "TBC Bank Group PLC"nin törəmə şirkəti olan "TBC Bank" ilə strateji tərəfdaşlıq barədə öhdəliksiz saziş imzalayıb.
FED.az xəbər verir ki, bankdan verilən məlumata görə, strateji tərəfdaşlıq barədə saziş "TBC Bank"ın Gürcüstan bazarında uğurlu təcrübəsinin istifadə olunması məqsədilə bağlanıb və "Nikoyl Bank"ın "TBC Bank"ın törəmə şirkəti olan "TBC Kredit" ilə tam inteqrasiyası və qarşılıqlı əlaqəsini nəzərdə tutur. Bu müqavilənin həyata keçirilməsi dövlət orqanları tərəfindən təsdiqlənməlidir. Strateji tərəfdaşlıq çərçivəsində "TBC Bank"ın nümayəndələri "Nikoyl Bank"ın Müşahidə Şurasının işində iştirak edəcək və ən yaxşı beynəlxalq təcrübəni tətbiq etməklə rəhbərliyə biznesin inkişafının sürətləndirilməsində kömək edəcək.
"Nikoyl Bank"ın İdarə Heyətinin sədri Nikoloz Şurqaia bağlanan müqaviləni qiymətləndirib: “Biz müştərilər üçün öz sektorunda ən yaxşı xidmətlərə və rəqəmsal imkanlara malik Gürcüstanın aparıcı bankı TBC Bank ilə tərəfdaşlıq barədə saziş imzaladığımız üçün çox şadıq. Birlikdə biz Azərbaycan biznesi və vətəndaşları üçün ən müasir xidmətləri təqdim edə və dinamik inkişaf edən bazarda irəliləyişə nail ola bilərik. Nikoyl Bankın rəhbərliyi bu tərəfdaşlığın həm bankın, həm ümumilikdə ölkə iqtisadiyyatının inkişafına müsbət töhfə verəcəyinə inanır”.
"TBC Bank"ın Baş direktoru Vaxtanq Butsxrikidze təmsil etdiyi bankın Azərbaycan bazarında böyük təşəkkül və inkişaf yolu keçən və bu gün sadiq müştəri bazasına malik olan "Nikoyl Bank"ın tərəfdaşı olmasını yüksək qiymətləndirib: "Bu razılaşma Gürcüstanın ən böyük bankı olan və 2008-ci ildən etibarən fəaliyyət göstərdiyi Azərbaycan bazarında iştirak payını artırmaq məqsədinə yönələn TBC Bank üçün olduqca vacibdir. Biz Nikoyl Bank ilə təcrübəmizi və geniş məhsul çeşidlərimizi paylaşmağa hazırıq və onun biznesinin inkişafına töhfə verməyə şad olardıq”.
