Xəbər verildiyi kimi, nüfuzlu «The Banker» jurnalı 2022-ciil üzrə «İlin bankı» mükafatının qaliblərinin siyahısını elan edib. Azərbaycan üzrə «İlin bankı» nominasiyasına ölkənin bank sektorunun lideri olan Azərbaycan Beynəlxalq Bankı - ABB layiq görülüb.
FED.az xəbər verir ki, «The Banker»in bununla bağlı açıqlamasında bildirilir ki, bank bu mükafata ötən vaxt ərzində iqtisadi və maliyyə göstəricilərinin ciddi inkişafına və mühüm təşəbbüslərinə görə layiq görülüb.
«The Banker» bildirir ki, 2020-ci ildə baş verən iqtisadi geriləmədən sonra 2021-ci ildə Azərbaycanın vəziyyəti xeyli yaxşılaşıb. Neft və qaz qiymətləri xarici ticarət balansını gücləndirdi, qeyri-enerji sektoru isə ümumi daxili məhsulun artımına təkan verdi.
Bu arada ABB bankı öz kapital mövqeyini gücləndirməkdə davam edir, eyni zamanda rəqəmsal bankçılıq və gənc mütəxəssislər üçün İT təlimi kimi sahələrdə bir sıra mühüm təşəbbüslərə başlayır.
2019-cu ilin sonunda ABB Tech Academy-nin fəaliyyətə başlaması bankın ölkənin gələcəyinə sadiqliyini göstərdi, akademiya Azərbaycanın texnoloji sektorunu inkişaf etdirməyə və müxtəlif sahələrdə yeni İT mütəxəssisləri nəsillərinin yetişdirilməsinə yönəlmiş təlim proqramları təqdim edib. Bura back-end və front-end veb və mobil inkişaf, kibertəhlükəsizlik və maşın öyrənməsi kimi sahələr aiddir.
Bu arada, korporativ innovasiya proqramı olan ABB İnnovasiya Mərkəzi öz ideyalarını biznesə çevirmək istəyən erkən mərhələdə olan startaplar üçün mühüm inkubator kimi özünü təsdiqlədi və üçüncü inkubator proqramı bu ilin sonunda başlayacaq. İndiyədək innovasiya mərkəzi potensial investorlara 22 startap təqdim edib.
Bank həmçinin Fayda adlı loyallıq proqramını işə salıb, bu proqram vasitəsilə istifadəçilər ABB-nin mobil tətbiqi vasitəsilə müxtəlif ödənişlər nəticəsində bonuslar əldə edə bilirlər. 2021-ci ilin noyabr ayında isə ABB kart sahiblərinə bəzi əməliyyatları üçün Apple Pay-dən istifadə etmək imkanı yaradıldı.
Maliyyə göstəriciləri baxımından, 2021-ci ildə ABB-nin ümumi aktivləri 21,7% artıb, 1-ci dərəcəli kapitalın həcmi sabit qalıb.
Eyni zamanda, bankın kapital gəlirliyi 2020-ci ildəki 10,6%-dən 2021-ci ildə 12,4%-ə yüksəlib, problemli kreditlər isə illik ifadədə 7,7%-dən 4,2%-ə düşüb.
