Son illər fermerlər istər iribuynuzlu, istərsə də xırdabuynuzlu heyvanların cins tərkibinin yaxşılaşdırılmasına maraq göstərirlər. Məhsuldarlığı aşağı olan cinslər daha məhsuldar heyvanlarla əvəzlənir.
Eləcə də bax: 12 baş qoyunla «Galenvagen» almaq olarmı? - AQROBİZNES
FED.az xəbər verir ki, Tovuzun Dönük Qırıqlı kəndində yaşayan fermer Fərhad Məmmədov da təsərrüfatını məhsuldar cins qoyunlarla əvəz edib. O, “Qaradolaq” cinsindən olan bu qoyunları artıq on ildir artırmaqla məşğuldur. Fərhad Məmmədovun sözlərinə görə, yerli qoyunlarla müqayisədə bu cins olduqca gəlirlidir.
Qış yeni girsə də, təsərrüfat sahibinin əldə etdiyi nəticələr ürəkaçandır. “Qaradolaq” qoyunları olduqca məhsuldar cinsdir. Onların həm ətini, həm də südünü satıb, qazanc götürürəm. Qoyunları 100-150 başa qədər artırıram. Daha sonra isə ehtiyac olduqca satışını təşkil edirəm. Bir ana qoyundan ildə 3 quzu götürürəm”, - deyə o bildirib.
Eləcə də bax: Azərbaycana çox məhsuldar qoyun növü gətiriləcək - İLDƏ 2-5 BALA VERİR
Fermer deyir ki, yerli qoyunlardan çəkisi 10-12 kiloqram artıq olan bu heyvanların əti də şirin dadı ilə seçilir. O, ötən il təsərrüfatındakı dişi qoyunların demək olar ki, 90 faizindən bala əldə edib. Qoyunlar dölə nə qədər tez başlasa bu, fermerin xeyrinədir. Quzular isə ətlik kimi yaz aylarında satışa çıxarılacaq. Çünki payızın sonu, qışın əvvəlində doğulan quzu artıq yazın sonlarında satış üçün istənilən çəkidə olur.
Fərhad Məmmədov bayram günlərində də bu cins qoyunlarının satışını təşkil edir. “Qaradolaq” qoyunlarının bir üstün cəhəti də kökəlməyə meyilli olmasıdır. Belə ki, iki yaşlı erkək qoyun kökəlmə dövründə 100-110 kiloqram ət verə bilir. Bu cins qoyunlar adətən çöldə deyil, qapalı, tövlə şəraitində saxlanılmalıdır.
Bu qoyunların başı kiçik, ayaqları və boynu uzundur. Boğazı, qarnı və ayaqları qısa tüklərlə örtülü olur. Rəngi bozumtul-ağ olan “Qaradolaq” qoyunlarının qulaqları çox qısadır. Qoçları buynuzsuzdur.
“Qaradolaq” qoyunlarının əsas xüsusiyyətlərindən biri də çox bala verməsi, əkiz doğmaya tez-tez təsadüf olunmasıdır. Hər 100 baş doğar qoyundan orta hesabla 115-120 baş quzu alınır. Yaxşı bəslənildikdə 100 qoyundan 150 bala da almaq olur. Eyni zamanda, xəstəliyə qarşı dözümlüdür. Bütün bu xüsusiyyətlərinə görə fermerlərin diqqətini cəlb edən “Qaradolaq” qoyunları respublikamızda getdikcə daha geniş yayılmaqdadır.
Tovuzlu fermer bu il qoyunların sayını bir qədər də artırmağı planlaşdırır.
Eləcə də bax: Azərbaycanda yeni qoyun cinsi yaradıldı
@Azərtac
