Banner

Turizm

Azərbaycanlılar xaricə səyahətlərini – LƏĞV ETMƏYƏ BAŞLAYIBLAR

Azərbaycanlılar xaricə səyahətlərini – LƏĞV ETMƏYƏ BAŞLAYIBLAR | FED.az
13:35 13 Mart 2020

Koronavirusun bütün dünyada sürətlə yayılması, onun gətirdiyi nəticələr və qadağalar Azərbaycandan xaricə turist axınına da təsir etməyə başlayıb. 

Koronavirusun yayılmasına görə, azərbaycanlılar xarici səyahətlərini təxirə salmağa başlayıblar. 

Turizm şirkətlərindən FED.az-a verilən məlumata görə, indiyədək tur almış şəxslərin bir hissəsi səyahət planlarını təxirə salmağa başlayıblar.

«Gezz Travel» şirkətinin direktoru Füruzə Quliyeva deyir ki, yay mövsümü üçün erkən rezervasiyalar başlasa da, qarşıdakı aylar üçün tur alanların əksəriyyəti səyahətini təxirə salıb onları geri qaytarır: « Yay üçün olunan erkən rezervasiyalar hələ ki, yerindədir, yəni yay tətilini hələ heç kim ləğv etməyib. Amma, mart, aprel, may ayı üçün olan turların əksəriyyəti qaytarılıb. Bu ərəfələrdə koronavirusla bağlı xaricdə olan bütün görüşlər ləğv olunduğu üçün hamı turlarını qaytarır. Hek kim heç yerə getmək istəmir».

Şirkət direktoru bildirir ki, erkən rezervasiya üçün qiymət endirimi həmişəki kimidir: «Erkən rezervasiya üçün endirimlər ənənəvidir - yanvar ayına kimi 50%-ə yaxın endirim olur, fevral ayında 20-40%, mart ayının sonuna kimi isə 15-20%-ə qədər endirimlər var».

Şirkət rəsmisi qeyd edib ki, ötən illə müqayisədə Türkiyə istiqamətinə qiymətlərdə azalma hələ ki yoxdur: «Ötən il pik sezonda alınan ən yüksək tur qiymətləri ilə müqayisədə bu ilin erkən rezarvasiya qiymətləri demək olar ki, bərabərdir. Amma qaytarılma şərtləri daha yüngülləşib. Bir çox aviakampaniyalar ya biletlərin pullarını qaytarır, bəziləri pulsuz dəyişmə imkanı verir. Əksəriyyəti pulsuz qaytarılma şərtlərini hər yerə bəyan edib. Hamı da bundan istifadə edir».

Füruzə Quliyevanın sözlərinə görə, bu ay 12 nəfərin tur paketini qaytarıb: «Bu ay üçün satdığımız bütün turlar qayıdıb, demək olar ki, səfər edən olmayıb. Mart ayı üçün 20-dən çox tur satmışdıq. «Pegasus Airlines» yeni açılanda sərfəli qiymətlər təklif edirdi. Bu aviakampaniya ümumiyyətlə, reysi ləğv etdi. Kampaniyadan bildirildi ki, mart ayı üçün Bakıdan uçuş keçirilməyəcək, bütün biletlər qaytarıldı. İstanbulda idman tədbirləri, eləcə də iş görüşmələrinə gedənlər də vardı, amma rəsmi email gəldi ki, görüşlər koronavirusa görə ləğv olunub. Bundan əlavə, Kiyevdə iş adamlarının tədbiri keçiriləcəkdi. Burada da tədbir təxirə salındığı üçün bütün tur qaytarıldı. Macarıstan və Avstryada «Wizz Air» Budapeşt üzərindən xeyli satışımız olmuşdu. Onlarda da İtaliyaya görə qorxu yarandığına üçün «Wizz Air» uçuşları təxirə saldı. Həmçinin Berlin istiqamətindən bir neçə nəfər bilet almaq istəsə də, hazırda qorxudan heç kim almır, hamı fikrindən daşınıb. Bilet alanların əksəriyyəti qaytarılma şərtlərini soruşur. Çox gərgin vəziyyətdir. Demək olar ki, mövcud vəziyyət ən çox turizmə təsir edir. Bütün satışlar dayanıb, satış olunmuş şəxslər də bütün biletlərini qaytarıb».

Turizm şirkətində bildirirlər ki, bu il səyahət edənlərin daha çox olacağı gözlənilirdi: «İnsanların vəziyyətlərinə, aldıqların turun dəyərini müşahidə edirəm. Bu il daha bahalı turlar alınırdı, səyahət etmək istəyənlərin sayı çoxalmışdı. Amma virusa görə əksər turlar qaytarılıb. Hətta müştərilər o qədər panikaya düşüb ki, getdikləri istiqamətdə virus ehtimalı olmasa belə, bizimlə dava edirlər ki, turları qaytarın. Deyirlər ki, biz ölməyə getmək istəmirik. Hətta bəzən turun geri qaytarılması ilə bağlı çətinilk olanda müştərilər bizə irad da bildirirlər. Məsələ bundadır ki, rəsmi qərar olmayan yerlərdə turları qaytarmaq çətindir. Bu səbəbdən də bir xeyli narazılıqlar olur».

«RR Travel Company» şirkətinin nümayəndəsi Günəş Şirvanskaya da bildirib ki, yanvar ayının əvvəlindən erkən rezarvasya başlasa da, indiyədək alınan bəzi turlar geri qaytarılmağa başlayıb: «Türkiyə istiqamətinə - Antaliyaya, Boduruma erkən rezarvasiyalar başlayıb. Amma bu ilin 3 ayı ərzində alınan turlar qaytarılıb. Vətəndaşlarda müəyyən narahatlıqlar var. Bilmirlər ki, koronavirus yay dövrünə qədər bitəcək, ya yox. Ümumilikdə çoxluq gözləmə mövqeyindədir. Yay sezonuna hələ 3 aya yaxın vaxt var. Kim ki, yaxın müddətdə uçmaq istəyir onlarda narahatlıq daha çoxdur».

Şirkət rəsmisi onu da qeyd edib ki, Türkiyə istiqamətində turlar ötən illə müqayisədə bu il daha yüksəkdir: «Keçən ilki qiymətlərlə müqayisədə bu il qiymətlər nisbətən daha yüksəkdir. Bu, otellərin özünün təsdiq etdiyi qiymətlərlə bağlıdır. Koronavirusun nəticəsinin necə olacağı qeyri-müəyyəndir. Tur almaq istəyənlər tərəddüd edirlər, gözləyirlər. Amma mövcud alıcıların çox az hissəsi qaytarıb, bir hissəsi gözləyir, narahatlığın yaya kimi başa çatacağını düşünürlər. İnsanlar istirahət etməkdə maraqlıdırlar, sadəcə virusa görə gözləyirlər».

Digər xəbərlər

Banner