“Almond Cake & Bakery” sosial şəbəkələrdə geniş müzakirələrə və sərt tənqidlərə səbəb olan reklam çarxının yayımını dayandırıb.
Azərbaycan "Reklam haqqında" Qanunda - BOŞLUQLAR VAR – TƏHLİL
FED.az xəbər verir ki, şirkət məsələ ilə bağlı yaydığı rəsmi açıqlamada son günlər reklam ətrafında səsləndirilən fikirlərin və yaranan müzakirələrin rəhbərliyi məyus etdiyini bildirib.
Açıqlamada reklam çarxının sağlam və təbii qida dəyərlərinin ön plana çıxarılması məqsədilə hazırlandığı, lakin məzmunun cəmiyyətdə, xüsusilə qadınlar arasında narahatlıq yaratdığı etiraf edilib.
“Bütün iradları ciddiyyətlə qəbul edirik”
“Almond Cake & Bakery” bildirib ki, reklamla bağlı səsləndirilən bütün fikirlər diqqətlə dinlənilir və iradlar ciddi qəbul olunur.
Şirkətin açıqlamasında vurğulanıb ki, reklamın məqsədi insanların xarici görünüşünü, şəxsi seçimlərini və fərdi qərarlarını mühakimə etmək, yaxud hər hansı qrupu hədəfə almaq olmayıb.
Bununla belə, reklamın auditoriya tərəfindən şirkətin ilkin niyyətindən tamamilə fərqli formada qəbul edildiyi bildirilib. Brend yaranan müzakirələrin vermək istədiyi əsas mesajdan uzaqlaşmasını təəssüflə qarşıladığını qeyd edib.
Qalmaqallı reklam dayandırıldı
Şirkət yaranmış ictimai reaksiyanın reklamın brendin təmsil etdiyi dəyərləri düzgün çatdıra bilmədiyini göstərdiyini açıqlayıb.
Buna görə də sosial şəbəkələrdə səsləndirilən rəylər və yaranmış həssaslıq nəzərə alınaraq reklam çarxının yayımının dayandırılması barədə qərar qəbul edilib.
“Almond Cake & Bakery” heç bir qarşıdurmanın, polemikanın və şirkətin fəaliyyəti ilə birbaşa əlaqəsi olmayan müzakirələrin tərəfi və ya subyekti olmaq istəmədiyini bəyan edib.
Şirkət gələcək kommunikasiya layihələrində yaradıcı qərarların qəbuluna əlavə qiymətləndirmə mexanizmlərinin tətbiq ediləcəyini və reklamların mümkün ictimai təsirlərinin əvvəlcədən daha əhatəli şəkildə təhlil olunacağını açıqlayıb.
“Fikirlərini bizimlə bölüşən, rəy və mövqelərini hörmət çərçivəsində ifadə edən hər kəsə təşəkkür edir, müştərilərimizin etimadını hər zaman ən böyük prioritetimiz hesab etdiyimizi bir daha vurğulayırıq”, – açıqlamada bildirilib.
Nə baş verib?
Müzakirələr aktyor və ssenarist Taleh Yüzbəyovun rol aldığı, “Almond Cake & Bakery”nin təbii dondurmalarını tanıdan reklam çarxının yayımlanmasından sonra başlayıb.
“Təbii, ya qeyri-təbii?” adı ilə təqdim olunan reklamda Taleh Yüzbəyov qarşısında əyləşən qadının xarici görünüşündəki estetik müdaxilələri və prosedurları sadalayır, daha sonra auditoriyaya “Siz də təbiiliyi daha çox sevirsiniz?” sualını ünvanlayırdı. Reklamın əsas kommersiya mesajı təbii inqrediyentlərdən hazırlanan dondurmanın üstünlüyünü vurğulamaq idi.
Lakin məhsulun “təbiiliyi” ilə qadının xarici görünüşünün müqayisə edilməsi sosial şəbəkələrdə birmənalı qarşılanmayıb. Tənqidçilər reklamın estetik prosedur etdirən qadınları məsxərəyə qoyduğunu, qadın bədənini marketinq vasitəsinə çevirdiyini və xarici görünüşlə bağlı stereotipləri gücləndirdiyini bildiriblər. Bəzi sosial şəbəkə istifadəçiləri hətta brendin boykot edilməsinə çağırış ediblər.
Taleh Yüzbəyov tənqidlərə sosial şəbəkə hesabında cavab verərək qadınların da kişilər kimi tənqid edilə biləcəyini bildirib. O, estetik əməliyyat etdirməyin şəxsi seçim olduğu kimi, estetik görünüşü bəyənib-bəyənməməyin də digər insanların seçimi olduğunu qeyd edib. Aktyor reklam seriyasının sonrakı buraxılışlarında kişilərin də mövzu ediləcəyini açıqlayıb.
Müzakirələr daha sonra əlavə iddialarla genişlənib.
Beləliklə, əvvəlcə məhsulun təbii tərkibini vurğulamaq məqsədi daşıyan reklam qısa müddətdə qadınların xarici görünüşü, estetik müdaxilələr, reklam etikası və brendlərin ictimai məsuliyyəti ilə bağlı daha geniş müzakirəyə çevrilib. Yaranan reputasiya riski fonunda “Almond Cake & Bakery” reklamın mesajının düzgün çatdırılmadığını qəbul edərək onun yayımını dayandırıb.
