Azərbaycan sığorta bazarında daim öz yenilikləri və yüksək inkişaf dinamikası ilə seçilən “Qala Sığorta” ASC “İlin Sığorta Şirkəti” nominasiyası üzrə ölkənin ən nüfuzlu biznes mükafatı sayılan “Uğur 2018” Milli Mükafatına layiq görülüb.
Təqdimat mərasimdə çıxış edən “Qala Sığorta” şirkətinin İdarə Heyətinin sədri Fuad Allahverdiyev “Qala Sığorta” və “Qala Həyat Sığorta” şirkəti adından təşkilatçılara öz minnətdarlığını bildirib.
F.Allahverdiyev qeyd edib ki, belə bir mükafata layiq olmaq şirkətin fəaliyyət göstərdiyi sahədə əməkdaşların göstərdiyi peşəkar səylərin və onların əldə etdiyi nailiyyətlərin nəticəsidir:
“Qazandığımız uğurlar və ölkənin ən nüfuzlu biznes mükafatını almaq öz növbəsində “Qala Sığorta” olaraq üzərimizdə daha böyük məsuliyyət yaradır. Əminəm ki, “Qala Sığorta” komandası belə bir məsuliyyəti dərindən dərk edərək bu gözləntiləri doğruldaraq növbəti uğurlara imza atacaq: - deyə F.Allahverdiyev vurğulayıb.
Qeyd edək ki, Azərbaycan sığorta bazarında geniş çeşidli məhsulları və çevik inkişafı ilə seçilən “Qala Sığorta” şirkəti 20 illik fəaliyyət tarixinə malikdir. Şirkət rebrendiq edərək 2015-ci ildən “Qala Sığorta” brendi altında yeni strategiya ilə fəaliyyətə başlayıb.
Xatırladaq ki, ölkənin işgüzar dairələrində ən nüfuzlu mükafat sayılan “Uğur” Milli Mükafatı 2000-ci ildə işgüzar nəşr olan “Consulting&Business” jurnalı tərəfindən təsis edilib. Mükafat fəaliyyət sahəsi üzrə əhəmiyyətli nailiyyətlər əldə etmiş və Azərbaycanın inkişafında töhfə vermiş qurumlara, təşkilatlara, şirkətlərə verilir.
“Qala Sığorta”ya ən nüfuzlu biznes mükafatı - “Uğur 2018” Milli Mükafatı təqim edildi
09:51
19 Fev 2019
