Azərbaycanda ikinci vençur fondunun yaradılması üçün ölkədə kifayət qədər startaplar olmalıdır.
"250 min dollar investisiya yatırmışıq, indi dəyəri 23 milyon dollardır"
FED.az xəbər verir ki, bunu Rəqəmsal İnkişaf və Nəqliyyat Nazirliyi yanında İnnovasiya və Rəqəmsal İnkişaf Agentliyinin (İRİA) sədr əvəzi İnarə Vəliyeva bildirib.
Onun sözlərinə görə, hazırda Azərbaycanda investisiya alətlərinin inkişafı üzrə müxtəlif istiqamətlərdə işlər aparılır: “Lakin əlavə vençur fondların yaradılması üçün ölkədə kifayət qədər startap olmalıdır”.
İ.Vəliyevanın sözlərinə görə, İRİA növbəti vençur fondlarında daha çox özəl tərəfdaşların olmasını gözləyir.
O bildirib ki, mələk investorlar daha kiçik məbləğlərdə startaplara yardım göstərirlər: “İnnovasiya və Rəqəmsal İnkişaf Agentliyi yerli startap ekosisteminin inkişafı istiqamətində ölkənin ilk rəsmi Mələk İnvestorlar Klubu olan “Technovate – Sabah’’ ilə əməkdaşlığa davam edir. Ölkədə mələk investorların sayının artması startaplara böyük dəstək olacaq. Bu səbəbdən "Technovate-Sabah” klubu Azərbaycanda mələk investor olmaq istəyənlər üçün məktəb açıb. Ölkədə ilk dəfə fəaliyyətə başlayacaq məktəbin məqsədi ölkədəki mələk investorlara ilk olaraq nəzəri, daha sonra isə onları klub üzvü etməklə təcrübi biliklərə yiyələnməsini təmin etməkdir. Bundan əlavə, İRİA olaraq daha iki mələk investor klubuna dəstək oluruq”.
Xatırladaq ki, 2022-ci ildə İnnovasiya və Rəqəmsal İnkişaf Agentliyi investorların iştirakı ilə innovasiya ekosisteminin inkişafı üçün “Caucasus Ventures” vençur fondunu yaradıb.
Qeyd edək ki, sözügedən fondun nizamnamə kapitalı 11,3 milyon manat təşkil edir. “Paşa Holdinq” Şirkətlər Qrupu fonda 5 milyon manat və fərdi sahibkarlar 1,3 milyon manat vəsait ayırmaq haqqında razılığa gəliblər. Eyni zamanda İnnovasiya və Rəqəmsal İnkişaf Agentliyi özəl tərəfdaşların təşəbbüsünə dəstək göstərərək “Caucasus Ventures”ə əlavə 5 milyon manat vəsait ayırıb. (Report)
