Maliyyə

Azərbaycan manatının real effektiv məzənnəsində artım davam edir

Azərbaycan manatının real effektiv məzənnəsində artım davam edir | FED.az
15:56 8 Dek 2017

Azərbaycan manatının real effektiv məzənnəsi 2017-ci il noyabr ayının 1-nə 93,6 bənd təşkil edib. Fed.az Azərbaycan Mərkəzi Bankına (AMB) istinadən xəbər verir ki, bu, oktyabrın 1-nə olan analoji göstəricidən 2,1 faiz bəndi çoxdur. Keçən ilin analoji dövrünə olan göstəriciyə nisbətən isə real effektiv məzənnə 2,4 faiz bəndi artıb.
Real effektiv məzənnənin bir qədər azalmasına səbəb Azərbaycanın əsas ticarət tərəfdaşı olan ölkələrin milli valyutaları - Türkiyə lirəsi, Rusiya rublu və Çin yuanının dollarla müqayisədə oktyabrda ucuzlaşması amili göstərilir. Xatırladaq ki, manatın real effektiv məzənnəsi 2000-ci ildən hesablanır, minimum səviyyəsi 2004-cü ildə 74,2, maksimum səviyyəsi 2015-ci il fevralın 1-nə 153,1 bənd təşkil edib. Maliyyə böhranı başlayandan isə minimum hədd 2016-cı il sentyabrın 1-də - 87 bənd olub.
Qeyd edək ki, real effektiv məzənnə - manatın ticarət tərəfdaşı olan ölkələrin valyutalarına nəzərən ikitərəfli nominal məzənnələrinin dəyişməsinin ticarət xüsusi çəkiləri və həmin ölkələrdə inflyasiya nəzərə alınmaqla həndəsi ortalamasını əks etdirir. Yəni, milli valyutanın bir neçə valyutaya nəzərən orta çəkili dəyişmə indeksidir.
"Report"un analitik qrupu hesab edir ki, manatın real effektiv məzənnəsi üçün 85-90 bənd diapazonu qənaətbəxş səviyyədir. Noyabrda da real effektiv məzənnədə artım olacağı proqnozlaşdırılır və ilin sonuna qədər bu artım davam edəcək.

Digər xəbərlər