Azərbaycan Mərkəzi Bankında (AMB) Fransa Sahibkarlar Təşkilatı - "MEDEF International"ın icraçı direktoru cənab Filip Qotyenin rəhbərlik etdiyi nümayəndə heyəti ilə görüş keçirilib.
FED.az xəbər verir ki, görüş "MEDEF lnternational" təşkilatının 2019-cu ilin iyul ayında ölkəmizə həyata keçirdiyi son səfərinin davamı olan işgüzar səfər çərçivəsində təşkil olunub.
Görüşdə qeyd olunub ki, səfərin məqsədi Fransa şirkətləri ilə onların Azərbaycan tərəfdaşları arasında birbaşa əlaqələri inkişaf etdirmək və Fransa ilə əməkdaşlığın yeni istiqamətlərini müəyyən etməkdən ibarətdir.
Görüş zamanı bildirilib ki, prezident İlham Əliyev tərəfindən ölkədə yeni nəsil islahatlara start verilib, növbəti strateji dövr üçün milli inkişaf prioritetləri müəyyən edilib. Qeyd edilib ki, bu islahatlar məzmununa görə məqsədyönlü və konkret strateji hədəflərin reallaşmasına, ölkədə dayanıqlı artan rəqabətqabiliyyətli iqtisadiyyatın formalaşmasına, inklüziv və sosial ədalətə əsaslanan cəmiyyətin qurulmasına, rəqabətli insan kapitalı və müasir innovasiyalar məkanının yaradılmasına yönəlib. Xüsusilə vurğulanıb ki, ölkədə islahatların uğurla həyata keçirilməsində beynəlxalq təşkilatlarla əməkdaşlıq daima mühüm rol oynayıb.
Qeyd edilib ki, pandemiyanın bütün ölkələrə olduğu kimi Azərbaycan iqtisadiyyatına da mənfi təsirlərinə baxmayaraq ölkədə makroiqtisadi sabitlik qorunub, maliyyə-bank sektorunun dayanıqlığı təmin olunub, artıq ötən ildə ölkə iqtisadiyyatının bütün sahələrində effektiv bərpaya nail olunub.
Nümayəndə heyətinin diqqətinə çatdırılıb ki, ölkəmiz Vətən müharibəsində möhtəşəm zəfər çalaraq otuz ilə yaxın işğal altında olan torpaqlarımızı azad etdikdən sonra Qarabağ və Şərqi Zəngəzur iqtisadi rayonlarının yenidən qurulmasına, xüsusi strategiyaya uyğun olaraq işğaldan azad olunmuş torpaqlarımızın abadlaşması, orada həyatın yenidən canlandırılması yolunda böyük quruculuq işlərinə başlanılıb və bu işlərdə maliyyə-bank sektoru da fəal iştirak edir.
Nümayəndə heyəti tərəfindən qeyd olunub ki, Azərbaycanın əlverişli investisiya mühiti Fransa biznes subyektləri üçün də imkanlar açır və bu xüsusda post-pandemiya mərhələsində ölkənin qeyri-neft sektorunun şaxələndirilməsi, xüsusən də işğaldan azad edilmiş ərazilərin yenidən qurulması prioritetlərilə tanışlıq mühüm məsələlər kimi diqqəti çəkir.
Vurğulanıb ki, qurum 1989-cu ildə Fransa Biznes Konfederasiyası olan MEDEF tərəfindən yaradılmış qeyri-kommersiya özəl təşkilatıdır və hal hazırda Fransanın ən böyük biznes federasiyasıdır. Təşkilat fransız şirkətlərinin nou-haularını kollektiv fəaliyyət vasitəsilə xaricdə təşviq etmək məqsədi daşıyır, xüsusilə də inkişaf etməkdə olan bazarlarda ticarət, texnologiya əməkdaşlığı və investisiya, uzunmüddətli tərəfdaşlığı dəstəkləyir.
Görüşdə pul siyasətinin əsas istiqamətləri, inflyasiya proseslərilə mübarizə tədbirləri, həmçinin bank-sığorta fəaliyyətində iştirak məsələləri müzakirə olunub və qarşıdakı dövrdə də qeyd olunan məsələlər ətrafında müzakirələrin davam etdirilməsinin zəruriliyi vurğulanıb. (Apa)
