Bu gün Bakı Ağır Cinayətlər Məhkəməsində mənimsəmədə və vergidən yayınmada təqsirləndirilən Sahib Ağayevin məhkəməsi keçirilib.
FED.az-ın verdiyi xəbərə görə, hakim Samir Əliyevin icraatında olan prosesdə baxış iclası baş tutub.
Hakim bildirib ki, cinayət işində dövlət sirri olduğu üçün proses qapalı keçiriləcək. Buna görə jurnalistlər zaldan çıxarılıb. Daha sonra məhkəmə davam etdirilib.
Bu işdə Dövlət Təhlükəsizliyi Xidməti və Vergilər Nazirliyi zərərçəkmiş kimi tanınıb. Hər iki qurum S. Ağayev tərəfindən dəyən zərərin ödənilməsi üçün mülki iddia qaldırıb.
İttihama görə, S.Ağayev 30 milyon manatdan artıq pulu mənimsəməkdə təqsirli bilinir. O, Qazaxıstanda saxlanılaraq Azərbaycana gətirilib.
O, keçmiş nazir Eldar Mahmudovun iş ortağı olub. Onun işi ilə bağlı E.Mahmudov istintaqa şahid kimi ifadə verib.
Mətbuatda yayılan məlumata görə, S.Ağayev Bakıda keçirilmiş Avropa Oyunları ərəfəsində sonradan ləğv edilmiş Milli Təhlükəsizlik Nazirliyi ilə Avropa Oyunlarının təhlükəsizliyinin təmin edilməsi məqsədilə xüsusi avadanlığın gətirilməsi və quraşdırılması üzrə müqavilə bağlayıb.
İstintaq S.Ağayevi 30 milyon manatın mənimsənilməsində ittiham edir. Bir müddət sonra həmin pullar S.Ağayevin xarici şirkətinin hesabına yatırılıb. Bundan başqa, Eldar Mahmudovun cinayət ortağı xüsusilə böyük məbləğdə vergidən yayınmada da ittiham edilir.
