İran səhvən vurulan Ukrayna Hava Yollarına məxsus “Boeing-737” təyyarəsinə görə Ukraynaya təzminat ödəməkdən imtina edib.

Eləcə də bax: İran Ukrayna təyyarəsini - SƏHVƏN VURDUĞUNU AÇIQLADI

FED.az xəbər verir ki, bu barədə Ukrayna xarici işlər nazirinin müavini Yevgeniy Yenin açıqlama verib.

Onun sözlərinə görə, İran hökuməti 200 milyon avro təzminat məbləğini gələn ilin büdcəsinə daxil etməkdən imtina edib. Yenin qeyd edib ki, onlar bu vəsaiti milli inkişaf fondundan ayırmaq istəyirdilər.

Yenin, İran tərəfi ilə təzminat miqdarı ilə bağlı danışıqların hələ başlamadığını qeyd edib. Eyni zamanda, Ukraynanın təzminat məbləği ilə bağlı mövqeyinin fəlakətin şərtlərindən və obyektiv istintaqı təmin etmək üçün İranın əməkdaşlıq dərəcəsindən asılı olduğunu bildirib.

Bundan əvvəl İran Mərkəzi Sığortasının rəhbəri Qolamreza Soleimani, Ukraynanın “Boeing-737” təyyarəsinin Avropa şirkətləri tərəfindən sığortalandığını, buna görə onların təzminat ödəməli olduqlarını söylədi. Bununla belə, İran Xarici İşlər Nazirliyinin rəsmi nümayəndəsi Abbas Musəvi, Tehranın təzminat ödəməsinə razı olduğunu bildirib.

Xatırladaq ki, 8 yanvarda Tehrandan Kiyevə uçan Ukrayna Hava Yollarına məxsus “Boeing 737-800” təyyarəsi havaya qalxdıqdan dərhal sonra raket zərbəsi ilə vurulmuşdu. Hadisə nəticəsində 167 sərnişin və 9 ekipaj üzvünün hamısı həlak olmuşdu. İran təyyarənin səhvən HHM sistemi tərəfindən vurulduğunu etiraf etmişdi. (Qafqazinfo)