Xəbər verildiyi kimi, Haaqadakı Beynəlxalq Cinayət Məhkəməsinin Palatası Rusiya prezidenti Vladimir Putinin həbsi barədə order verib.
FED.az xatırladır ki, əsasən diktatorlar və insanlıq əleyhinə cinayətlər törətmiş şəxsləri mühakimə edən Beynəlxalq Cinayət Məhkəməsinə 123 ölkə üzvdür. Və bu qərardan sonra formal olaraq bu ölkələrin hamısında Putin həbs edilə bilər.
Artıq iki ölkənin rəsmiləri elan edib ki, Rusiya prezidenti bu ölkələrə səfər etsə, onu həbs edəcəklər. Bunlar Almaniya və Cənubi Afrikadır.
Belə ki, Almaniyanın ədliyyə naziri Marko Buşman elan edib ki, Putin Almaniyaya səfər etsə həbs ediləcək. Buşman bildirib ki, Beynəlxalq Məhkəmənin öz qərarını (Putinin həbsi barədə) İnterpola ötürəcəyini və həbs orderinin icrasının tələb ediləcəyini gözləyir. Bundan sonra isə Putinin həbsi artıq qanuni proses olacaq və o Almaniya ərazisinə daxil olarsa həbs ediləcək: «Putinin ayağı Almaniya ərazisinə dəyərsə, onu həbs edəcəyik»-deyə nazir bildirib.
Putinin həbs edilə biləcəyi ikinci ölkə Cənubi Afrika Respublikasıdır (CAR). Maraqlıdır ki, bu ölkə Rusiyanın aktiv iştirakı ilə yaradılmış BRİKS təşkilatının üzvüdür. Bununla yanaşı, CAR respublikası prezidentinin mətbuat katibi Vinsent Maqvenya bildirib ki, CAR beynəlxalq məhkəmə qarşısındakı «hüquqi öhdəliyini dərk edir» və əgər Putin bu ölkədə keçiriləcək BRİKS sammitinə səfərə gələrsə, hökumət bu həbs orderini nəzərə alacaq.
«Amma sammitə qədər biz müxtəlif maraqlı tərəflərlə əməkdaşlığımızı davam etdirəcəyik. Cənubi Afrika Ukraynadakı münaqişənin sülh yolu ilə həll olunmasının tərəfdarıdır»-deyə prezidentin nümaynədəsi bildirib.
Rusiyanın özündə isə məhkəmənin qərarından sonra onun qanunsuz olması, eləcə də Rusiyanın bu qərarı tanımadığı elan edilsə də, Rusiya İstintaq Komitəsi hər ehtimala qarşı dünya ölkələrinə xatırladıb ki, dövlət başçılarının məhkəmə qərarlarına qarşı mütləq immuniteti var. «Beynəlxalq hüquqi əsasən dövlət başçıları mütləq immunitetə malikdirlər»-deyə qurumun Teleqram səhifəsində elan edilib.
Üstəlik, İstintaq Komitəsi Putinin həbsinə order verən prokuror və 3 hakimə qarşı cinayət işi açıb.
