Azərbaycanda daha bir bank əmanət qəbulunu və kredit verilməsini dayandırıb.
FED.az xəbər verir ki, bu hazırda Azərbaycanda ən pis kapital göstəricisinə sahib olan «Dəmirbank»dir. Bank artıq 5 aydır ki, əmanət qəbul etmir. Bir ay əvvəl isə kredit verməyi də dayandırıb. Başqa sözlə, artıq bir aydır ki, bank öz fəaliyyəti ilə bağlı əsas əməliyyatları dayandırsa da, indiyədək bu vəziyyəti ictimaiyyətdən gizli saxlaya bilib.
«Dəmirbank»ın özündə bankın «offlayn» rejimə keçməsini təsdiqləsələr səbəblərini izah etməkdə çətinlik çəkiblər. Bankın nümaynədəsi Tofiq Ağayev FED.az-a əmanət qəbulunun və kreditlərin hansı səbəbən dayanmasını izah etməkdən boyun qaçırıb. Onun sözlərinə görə, bu, bank rəhbərinin göstərişi ilə edildiyi üçün səbəblərini də bankın rəhbərliyi açıqlaya bilər: «Bank rəhbərinin qərarı ilə dayandırılıb, rəhbər özü də açıqlaya bilər» –deyə T.Ağayev bildirib.
Bununla yanaşı, qeyd edək ki, vaxtilə bank sisteminin aktiv iştirakçılarından olan «Dəmirbank» hazırda çox çətin durumdadır. Bankın maliyyə göstəriciləri ürəkaçan deyil.
Eləcə də bax: 28 bank "oyundan kənardır": Gəlirlər 3 bankın əlində toplanıb
Bank, 2017-ci ilin üçüncü rübünü 20,4 milyon manat zərərlə başa vurub. Bu göstərici ilə ən böyük zərər edən 3 bankın sırasındadır.
Kapitalın həcminə gəlincə, «Dəmirbank» ölkə üzrə ən pis göstəriciyə malikdir. Hazırda bankın nizamnamə kapitalı nəzərdə tutulan tələbdən 2 qat azdır – 50 milyon manat əvəzinə, cəmi 25,57 milyon manat.
Eləcə də bax: Bank işçilərinin maaşlarına yenidən baxılacaq – MÜSAHİBƏ
Bankda əmanətlərin qəbulu və kreditlərin dayandırılmasının səbəblərini açıqlamasalar da, adətən belə hallarda banklara nəzarət edici qurum mümkün riskləri azaltmaq üçün belə göstərəcilərə malik olan banklara əmanət qəbulunu qadağan edir.
Şübhə doğurmur ki, bank tezliklə kapital çatışmazlığı problemini həll etməlidir. Əks halda ya fəaliyyətini dayandırmalı, ya da başqa bank tərəfindən «udulmalıdır».
Azərbaycanda daha bir bank gərginliyə dözmədi - ƏMANƏT və KREDİTLƏRƏ “STOP”
![Azərbaycanda daha bir bank gərginliyə dözmədi - ƏMANƏT və KREDİTLƏRƏ “STOP” | FED.az](upload/news/45015.jpg)
16:31
14 Dek 2017