Göygöl Şərab Zavodunun məhsulu olan “Karabakh” Böyük Britaniyanın London şəhərində keçirilən və şərabçılıqla  spirtli içkilər sahəsində dünyanın ən nüfuzlu beynəlxalq müsabiqələrindən biri hesab olunan IWSC – International Wine & Spirit Competition çərçivəsində uğur qazanıb.

 FED.az biznes və maliyyə xəbərləri portalı xəbər verir ki, müsabiqəyə təqdim olunan məhsul beynəlxalq ekspertlər tərəfindən qiymətləndirilib və 100 mümkün baldan 87 bal toplayaraq Bürünc medala layiq görülüb. Bu nəticə “Karabakh” şərabının keyfiyyət göstəricilərinin beynəlxalq səviyyədə tanınmasının mühüm göstəricisi  hesab olunur.

1969-cu ildə Böyük Britaniyada təsis edilən International Wine & Spirit Competition  yüksək qiymətləndirmə standartları, ciddi kor dequstasiya sistemi və peşəkar beynəlxalq münsiflər heyəti ilə tanınır. IWSC mükafatı məhsulun yalnız yerli bazarda deyil, qlobal şərab sənayesində də keyfiyyət və peşəkarlıq meyarlarına cavab verdiyini təsdiqləyən nüfuzlu göstəricilərdən biridir.

Göygöl Şərab Zavodu ölkənin şərabçılıq ənənələrini yaşadan aparıcı müəssisələrdən biri kimi tanınır. Müəssisə fəaliyyətində müasir istehsal yanaşmalarını tətbiq etməklə yanaşı, məhsul keyfiyyətinin qorunmasına və inkişafına xüsusi önəm verir. Zavodun məhsulları həm daxili bazarda, həm də xarici ölkələrdə istehlakçılara təqdim olunur. Qeyd edək ki, 165 ildən artıq tarixə malik “Göygöl Şərab Zavodu” ASC Azərbaycanın ən qədim spirtli içki istehsalçılardam  biridir. Müəssisənin  “Xan 1860” brendi altında təqdim etdiyi məhsullar, xüsusilə özünəməxsus   dad xüsusiyyətləri ilə seçilən  “Karabakh” şərabları müxtəlif ölkələrə ixrac olunur və dəfələrlə  beynəlxalq mükafat və sertifikatlara layiq görülüb.

Müəssisə fəaliyyət istiqamətlərini genişləndirərək 2026-cı ildən etibarən “Göygöl” brendi altında təbii içməli suların və “Tutu” brendi ilə müxtəlif dadlarda limonadların istehsalına da başlamışdır. Yeni məhsullar şirkətin məhsul portfelini daha da zənginləşdirərək istehlakçılara  müxtəlif və keyfiyyətli seçimlər təqdim etdir.