"Saxo Bank" bu ilin I rübü üçün "Brent" markalı neftin bir barelinin qiyməti üzrə proqnozunu deyişməyib.
FED.az xəbər verir ki, bunu TASS-a "Saxo Bank"ın əmtəə bazarları strategiyası şöbəsinin müdiri Ole Hansen deyib.
Onun sözlərinə görə, cari ilin I rübündə "Brent" neftinin orta qiyməti 50 dollar təşkil edəcək. Hansenin fikrincə, qiymətin 60 dollaradək yüksəlişi bu ilin ikinci yarısında baş verə bilər.
Neft qiymətinin artımının səbəbi kimi "OPEC+" razılaşması çərçivəsində fevral-mart aylarında gündəlik neft hasilatının əlavə olaraq 1,4 mln. bareldən çox azaldılması göstərilir. Azalmanın böyük hissəsi Səudiyyə Ərəbistanının payına düşəcək.
Qeyd edək ki, "OPEC+" ölkələri nazirlərinin 13-cü iclasında gündəlik xam neft hasilatı üzrə mövcud kvotaların fevral-mart aylarında da davam etdirilməsi barədə qərar qəbul edilib. "OPEC+" ölkələrinin gündəlik xam neft hasilatı üzrə ixtisarları fevralda 7,125 mln. barel, martda isə 7,5 mln. barel təşkil edəcək.
Azərbaycanın isə bu ilin yanvar ayındakı 123 min barel həcmində öhdəliyi fevral-mart aylarında sabit şəkildə qalacaq. "Əməkdaşlıq Bəyannaməsi"nə əsasən, növbəti iki ayda Azərbaycan gündəlik xam neft hasilatını 8 min barel artıraraq istehsalı 595 min barel səviyyəsində saxlayacaq.
Xatırladaq ki, Neft İxrac Edən Ölkələr Təşkilatına (OPEC) üzv və qeyri-üzv ölkələrin nazirlərinin ötən ilin dekabrında keçirilmiş 12-ci iclasında gündəlik xam neft hasilatının 2021-ci ilin yanvar ayında 0,5 mln. barel artırılması, "OPEC+" nazirlərinin hər ay keçiriləcək görüşləri vasitəsilə kvotaların qarşıdakı aylarda tədricən 2 mln. barelədək yumşaldılması razılaşdırılmışdı. (Apa)
