2025-ci ilin ilk 10 ayı ərzində Azərbaycanın neft sektoru ixracda əsas məhsul olmağa davam edib.

• Azərbaycanın meyvə-tərəvəzi xaricə neçəyə satılır? – SİYAHI, QİYMƏTLƏR

FED.az Dövlət Gömrük Komitəsinə istinadən xəbər verir ki, bu dövrdə bitumlu süxurlardan alınmış xam neft və neft məhsullarının ixracı 20,7 milyon tonu ötüb. Bu həcmdə neftin satışından ölkəyə daxil olan valyutanın ümumi həcmi isə 10 milyard 849 milyon dollardan çox olub.

Azərbaycan neftinin əsas alıcısı Avropa Birliyi ölkələri olaraq qalır. Təkcə İtaliya ixrac olunan neftin 58%-dən çoxunu (12 milyon ton) alaraq ölkəyə 6,2 milyard dollar gəlir gətirib. Bununla belə, Azərbaycanın neft ixracı  təkcə Avropa ilə məhdudlaşmır. Siyahıda Hindistan, Tailand, İndoneziya kimi Asiya ölkələri, eləcə də Tunis kimi ölkələr də var. 

Hesabat dövründə Azərbaycan neftinin bir barelinin dünya bazarındakı orta ixrac qiyməti təxminən 71,30 dollar (121,21 ₼) olub. Lakin alıcı ölkələrdən asılı olaraq qiymətlərdə əhəmiyyətli fərqlər yaranıb.

Neftimizi ən baha qiymətə alan ölkə Bolqarıstan olub. Bu ölkə bir barel üçün 82,97 dollar (141,05 ₼) ödəyib. Siyahının yuxarı pillələrində Danimarka, İsveçrə, Tailand və İndoneziya kimi ölkələr də yer alıb ki, onlar da nefti orta qiymətdən xeyli baha alıblar.

Ən böyük alıcı olan İtaliyanın bir barel üçün ödədiyi məbləğ orta qiymətdən bir qədər aşağı – 70,43 dollar (119,73 ₼) təşkil edib. Siyahıda ən aşağı qiymət isə qonşu Gürcüstana olan ixracda qeydə alınıb: bir barel üçün 56,40 dollar (95,88 ₼).