Banner

Energetika

"Evdən işləyəcəklər" - SOCAR koronaya görə işçilərini - EVƏ BURAXDI

"Evdən işləyəcəklər" - SOCAR koronaya görə işçilərini - EVƏ BURAXDI | FED.az
15:13 4 Mart 2020

SOCAR şirkəti korona virusa görə işə gələn əməkdaşlarını bu gün evə buraxıb.

FED.az xəbər verir ki, SOCAR-ın mətbuat xidmətinin rəhbəri İbrahim Əhmədov bu məlumatı "Ena.az"a təsdiqləyib:

Eləcə də bax: Azərbaycanda məktəblər bağlandı - RƏSMİ

“Bu profilaktik tədbirlərdir və əsasən də insanların çox toplaşdığı yerlərdə, məsələn ofis şəraitində xəstəliyə yoluxma riskini minimum azaltmaq məqsədi daşıyır. İşçilərə təklif olunub  ki, kompüter avadanlıqlarını götürüb evdən işləsinlər. Skayp üzərindən iclaslar təşkil olunsun, yəni bir otaqda çox adam yığışmasın.Virus yayılmış ölkələrdən gələn əməkdaşlar isə 2 gün ərzində işə çıxmayaraq SOCARın hesabına müayinədən keçəcəklər”.

İ.Əhmədov onu da bildirib ki, əməkdaşlara virusun yayıldığı xarici ölkələrə getməmək tövsiyyə olunub. Bir sözlə ölkədə virusun yayılmasının qarşısını almaq üçün SOCAR ciddi tədbirlərə başlayıb. 

Azərbaycan Dövlət Neft Şirkəti (SOCAR) Çində yayılmış koronavirus (SARS CoV - 2) infeksiyasının Azərbaycan ərazisində yarada biləcəyi təhlükənin qarşısının alınması məqsədilə beynəlxalq təcrübə əsasında tədbirlər görməyə başlayıb.

FED.az xəbər verir ki, bu tədbirlər çərçivəsində SOCAR-ın təlim-tədris müəssisələrində işlərin martın 10-dan dayandırılmasına qərar verilib, şirkətin təlim mərkəzlərində peşə təhsili alan şagirdlərin tədrisinin martın 10-na qədər dayandırılması üçün tədbirlər görmək tapşırılıb.

SOCAR-ın işçilərinə onların vəzifə funksiyalarını evdə yerinə yetirməsi mümkün olduğu hallarda və insanların toplaşdığı məkanlara gəlməsi üçün xüsusi zərurət olmadığı halda, struktur bölmələrin rəhbərlərilə razılaşdırmaqla, martın 20-nə qədər iş yerinə gəlmədən evdən işləmə (“From Home”) imkanları yaratmaq, işçilərin başqa qurumlarla olan fiziki görüşlərini, eləcə də SOCAR daxili iclasları və yaxud görüşləri mümkün qədər azaltmaqla və texnologiyanın imkanlarından yararlanmaqla (Business Skype görüşü, zəng və ya video konfrans və s.) belə görüşləri həyata keçirmək tapşırılıb.

Bundan başqa, SOCAR-ın inzibati binasının giriş hissələrində binaya daxil olan, xəstəliyin ilkin əlamətlərinin zahiri daşıyıcılarına malik şəxslərin həkim müayinəsi aparılacaq. BMT-nin Ümumdünya Səhiyyə Təşkilatının müəyyən etdiyi və koronavirus (SARS CoV - 2) infeksiyasının geniş yayıldığı ölkələrə səfərlərdən qayıdan işçilər üçün qayıtdığı gündən etibarən 2 gün ərzində işə çıxmadan SOCAR-ın hesabına tibbi testlər keçiriləcək.

SOCAR-ın inzibati binasının giriş-çıxışlarında binada olan şəxslərin bədən hərarətini ölçən avadanlıqlar, inzibati binada əllərin dezinfeksiya edilməsi üçün xüsusi vasitələr quraşdırılacaq, hava axını mümkün olduğu qədər viruslara qarşı ola biləcək (antiseptik) vasitələrlə zənginləşdiriləcək.

Komitə, komissiya iclasları və ya digər iclas və görüşlər, yalnız zəruri istehsalat halında həyata keçiriləcək, BMT-nin Ümumdünya Səhiyyə Təşkilatının müəyyən etdiyi və koronavirus (SARS CoV-2) infeksiyasının geniş yayıldığı ölkələrə səfərlər ləğv edilir və yalnız zərurət halında SOCAR-ın prezidenti ilə razılaşdırmaqla həyata keçirilə bilər.

Digər xəbərlər

Banner