Pakistanın baş naziri Şehbaz Şərif, Pakistan düyüsünün idxalının vergidən azad edilməsinə görə, Azərbaycana və prezident İlham Əliyevə təşəkkür edib.
FED.az xəbər verir ki, Pakistan hökumətinin başçısı bununla bağlı Tvitterdə post paylaşıb.
«Pakistan düyüsünün idxalının 5 il müddətində vergidən azad edilməsinə görə Azərbaycan prezidenti İlham Əliyevə təşəkkür edirəm. Bizim iki qardaş xalqlarımız avtomobil yolları, dəmiryolları və Qvadar limanı sistemləri vasitəsilə iqtisadi əlaqələri inkişaf etidrmək üzərində işləyəcəklər»-deyə Pakistan baş naziri bildirib.
Xatırladaq ki, Azərbaycanın Nazirlər Kabinetinin 22 noyabr tarixli qərarı ilə Pakistandan Azərbaycana idxal edilən düyü 2027-ci ilin sonunadək idxal vergisindən azad edilib.
Noyabrın 25-də isə prezident İlham Əliyev Bakıda keçirilən beynəlxalq konfransdakı çıxışında «Pakistandan keyfiyyətli düyü ala biləcəyimiz təqdirdə nə üçün onu başqalarından almalıyıq?» ifadəsi ilə Azərbaycanın Pakistana olan münasibətini bir daha təsdiqləyib.
“Biz bir-birimizi hansı məhsullarla təmin edə biləcəyimizi müzakirə etdik. Biz qardaş ölkədən keyfiyyətli düyü ala biləcəyimiz təqdirdə, nə üçün onu başqalarından almalıyıq?”, - dövlət başçısı qeyd edib.
Xatırladaq ki, hazırda Azərbaycanin xaricdən düyü idxalında əsas yeri Hindistan tutur. Belə ki, 2022-ci ilin ilk üç rübündə Azərbaycan xaricdən ümumi dəyəri 36,3 milyon dollar olan 42,87 min ton düyü idxal edib. Ölkəyə gətirilən düyünün 74%-i Hindistanın payına düşür - bu dövrdə Azərbaycana Hindistandan ümumi dəyəri 29,4 milyon dollar olan 31,7 min ton düyü idxal edilib. Bu da ümumi idxalın 70%-ni təşkil edirdi. Pakistandan isə bu il cəmi 0,94 min ton duyu idxal edilib. Azərbaycanın düyü idxalında Pakistanın payı cəmi 2% təşkil edir.
