Xəbər verildiyi kimi, Türkiyə Prezidenti Rəcəb Tayyib Ərdoğan noyabrın 8-də Azərbaycan Prezidenti İlham Əliyevin dəvəti ilə Azərbaycana rəsmi səfərə gəlib. Səfər Azərbaycanın Vətən müharibəsində qazandığı Qələbənin altıncı ildönümünə təsadüf edir.

FED.az xəbər verir ki, Türkiyə Prezidenti və xanımı Əminə Ərdoğanı Füzuli Beynəlxalq Hava Limanında Azərbaycan Prezidenti İlham Əliyev, xanımı Mehriban Əliyeva və qızları Leyla Əliyeva qarşılayıblar. Hava limanında Türkiyə dövlətinin başçısının şərəfinə fəxri qarovul dəstəsi düzülüb.

Şuşada rəsmi qarşılanma və təkbətək görüş

Füzulidən sonra Türkiyə Prezidenti Şuşaya yollanıb. Burada onun rəsmi qarşılanma mərasimi keçirilib. Mərasimdə Azərbaycan və Türkiyənin dövlət himnləri səsləndirilib, fəxri qarovul dəstəsi dövlət başçılarının qarşısından keçib. Hər iki ölkənin nümayəndə heyətlərinin üzvləri qarşılıqlı təqdim olunub. Daha sonra Azərbaycan Prezidenti İlham Əliyev ilə Türkiyə Prezidenti Rəcəb Tayyib Ərdoğan arasında təkbətək görüş keçirilib.

İlham Əliyev: Şuşa 28 il işğalda qalsa da, milli ruhunu itirmədi

Mətbuata bəyanatında Prezident İlham Əliyev Şuşanın azad edilməsinin altıncı ildönümünü xatırladıb.

Dövlət başçısı bildirib ki, Şuşa 28 il işğal altında qalmasına baxmayaraq, öz milli ruhunu itirməyib. Şəhərin azad edilməsi həm böyük rəmzi məna daşıyıb, həm də İkinci Qarabağ müharibəsinin mühüm mərhələlərindən biri olub.

Prezident xatırladıb ki, Şuşanın azad edilməsindən bir gün sonra Ermənistan rəsmən təslim olub və bununla da təxminən 30 illik işğala son qoyulub.

Türkiyənin müharibə zamanı dəstəyi

İlham Əliyev Türkiyənin İkinci Qarabağ müharibəsi zamanı Azərbaycana göstərdiyi dəstəyi xüsusi vurğulayıb.

Dövlət başçısı bildirib ki, müharibənin ilk saatlarında Rəcəb Tayyib Ərdoğanın verdiyi bəyanat və telefon danışığı bütün dünyaya Türkiyənin Azərbaycanın yanında olduğunu göstərib.

Prezidentin sözlərinə görə, 44 günlük müharibə ərzində Türkiyə Prezidenti və türk xalqı Azərbaycanın yanında olub.

İlham Əliyev Türkiyənin göstərdiyi mənəvi və siyasi dəstəyin Azərbaycan xalqının ruh yüksəkliyinə müsbət təsir etdiyini qeyd edib.

Dövlət başçısı Azərbaycan xalqının bu dəstəyi unutmayacağını bildirib.

Azərbaycan–Türkiyə birliyi barədə mesaj

İlham Əliyev iki ölkə arasındakı münasibətlərə də toxunub.

Prezident Azərbaycan və Türkiyə xalqlarının tarixi, mədəni və mənəvi bağlılığını vurğulayaraq iki dövlət arasında münasibətlərin xüsusi xarakter daşıdığını bildirib.

Dövlət başçısı Azərbaycan–Türkiyə birliyinin əbədi və sarsılmaz olduğunu qeyd edib.

Onun sözlərinə görə, bu birliyə xələl gətirmək istəyənlər öz məqsədlərinə nail ola bilməyəcəklər.

İlham Əliyev 2021-ci ildə imzalanmış Şuşa Bəyannaməsinin iki ölkə arasında müttəfiqlik münasibətlərinin rəsmiləşdirilməsində əhəmiyyətini də xatırladıb.

Əliyev bildirib ki, böyük coğrafiyanı əhatə edən ərazidə Türkiyə-Azərbaycan birliyi önəmli amildir. Bu, sabitlik, əməkdaşlıq, təhlükəsizlik faktorudur.

 “Bir daha demək istəyirəm ki, əziz qardaşım, hörmətli Prezidentin sıx qrafikinə baxmayaraq, bu Zəfər Günündə burada - Qarabağda olması bütün dünyaya bizim birliyimizi bir daha göstərir. Əminəm ki, bu birlik əbədi olacaq”, - deyə dövlətimizin başçısı əlavə edib.

İlham Əliyev bildirib ki: "Bizi birləşdirən ortaq tarixdir, etnik köklərdir, dilimizdir, ədəbiyyatımızdır, mənəvi dəyərlərimizdir. Bu, böyük sərvətdir və bu sərvət üzərində, bu güclü təməl üzərində bu gün dövlətlərarası münasibətlər də inkişaf edir".

“Bizim birliyimiz, qardaşlığımız sarsılmazdır. Bunu sarsıtmaq istəyənlər isə öz arzularına heç vaxt çatmayacaq, onların arzuları onların gözlərində qalacaq”, - deyə dövlətimizin başçısı əlavə edib.

Ərdoğan: Qarabağ Zəfəri bütün Türk dünyasının qürurudur

Türkiyə Prezidenti Rəcəb Tayyib Ərdoğan da bəyanatında Azərbaycanın Qarabağda qazandığı Qələbənin əhəmiyyətini vurğulayıb.

O, altı il əvvəl Azərbaycan xalqının Qarabağı işğaldan azad etdiyini xatırladaraq bu Qələbəni bütün Türk dünyasının qüruru kimi qiymətləndirib.

Ərdoğan Türkiyə ilə Azərbaycan arasında münasibətlərin ortaq tarix, dil və mədəniyyətə əsaslandığını bildirib.

Türkiyə Prezidenti 15 iyun 2021-ci ildə Şuşada imzalanmış Bəyannamə ilə iki ölkənin müttəfiqlik münasibətlərinin möhkəmləndirildiyini qeyd edib.

O, Azərbaycanla Türkiyə arasındakı qardaşlığı zəiflətmək istəyənlərin məqsədlərinə nail ola bilməyəcəklərini bildirib.

"Azərbaycanın 44 günlük müharibədə qazandığı şanlı Qələbə bütün Türk dünyasında sevinc doğurmaqda davam edir və tarixi ədalətin bərpasının göstəricisidir.

Türkiyə dövlətinin başçısı Azərbaycanla əlaqələrin əhəmiyyətini vurğulayaraq deyib: “Türkiyə ilə Azərbaycan arasındakı münasibətlər zamanın sınağından keçib. Bu gün biz “Bir millət, iki dövlət” kəlamında təcəssüm olunan qəlblərin birliyindən danışırıq. Əlaqələrimiz ortaq keçmişimizdən güc alır. Qardaşlığımız dil, tarix və mədəniyyətin ümumiliyinin hüdudlarını çoxdan aşıb. Məhz buna görə bu gün Bakı ilə Ankaranın sevincini bir-birindən ayırmırıq”.

Ərdoğan Azərbaycanın Qarabağda həyata keçirdiyi bərpa və quruculuq işlərini yüksək qiymətləndirdiyini, Türkiyənin bundan sonra da Azərbaycanın yanında olacağını vurğulayıb.

Türkiyə Prezidenti həmçinin Qarabağın işğaldan azad edilməsinin Cənubi Qafqazda yeni mərhələyə yol açdığını qeyd edib.

Səfərdə geniş nümayəndə heyəti iştirak edir

Rəcəb Tayyib Ərdoğanı Azərbaycana səfərdə Türkiyənin xarici işlər naziri Hakan Fidan, milli müdafiə naziri Yaşar Gülər, kənd təsərrüfatı və meşəçilik naziri İbrahim Yumaklı, Milli Kəşfiyyat Təşkilatının rəhbəri İbrahim Kalın və digər rəsmilər müşayiət edirlər.

Noyabrın 8-də Şuşada keçirilən görüş və prezidentlərin bəyanatları Azərbaycan–Türkiyə münasibətlərinin, müttəfiqlik əlaqələrinin və regional məsələlərin gündəmdə olduğunu bir daha nümayiş etdirib.