İngiltərə Mərkəzi Bankının iclasının nəticələrinin dərc olunması ərəfəsində funt dollar qarşısında sabitdir: treyderlər uçot faiz dərəcəsinin cari səviyyəsində qalacağını proqnoz edirlər. GBP/USD valyuta cütlüyü ötən günü 1.2722 səviyyəsində bağladı, bugün isə 1.2712 səviyyəsində ticarət olunur.
Eyni zamanda, EUR/USD cütlüyü əvvəlki bağlanış səviyyəsi 1.0744 həddindən 1.0742 həddinə qədər cüzi eniş göstərib. USDJPY cütlüyü isə artım tendensiyasını davam etdirir: ötən günün bağlanış səviyyəsi ilə müqayisədə 157.95 həddindən 158.14 həddinə qədər. Dollar indeksi isə 105.26 bənd səviyyəsində stabilləşib.
Cümə axşamı səhər qızılın qiyməti ABŞ-da dərc olunacaq makroiqtisadi məlumatlar ərəfəsində artım göstərir. Nyu-Yorkun “Comex” birjasında avqust ayı üzrə qızıl fyuçerslərinin qiyməti 10.35$ və ya 0.44% artaraq 1 troya unsiyası üçün 2353.05$-a, iyul ayı üzrə gümüş fyuçerslərinin qiyməti isə 1.63% bahalaşaaraq 30.317$-a qədər yüksəlib.
Qeyd etmək lazımdır ki, ABŞ-da əmək bazarına dair məlumatlar cümə axşamı dərc olunacaq. Proqnozlara əsasən, ölkədə 15 İyun tarixində bitən həftə üzrə İşsizlik Müavinəti üçün Müraciətlərin Sayı öncəki həftə ilə müqayisədə 242 mindən 235 minə enib. Eyni zamanda, daşınmaz əmlak bazarından da məlumatlar açıqlanacaq. Analitiklər hesab edirlər ki, ABŞ-da may ayında tikintisinə başlanılan yeni evlərin sayı aprel ilə müqayisədə 1.36 milyondan 1.37 milyona yüksəlib.
Məlumat İnvest-AZ İnvestisiya Şirkətinin analitikləri tərəfindən hazırlanıb.
Beynəlxalq birjalarda və Azərbaycanda istiqraz, səhm və digər investisiya alətləri ilə əməliyyatları InvestAZ investisiya şirkəti vasitəsilə həyata keçirmək mümkündür.
