Azərbaycanda dövlət qurumlarına məxsus 62 avtomobil hərraca çıxarılır.

• Müdafiə Nazirliyi və ABB-nin maşınları hərracda satıldı - QİYMƏTLƏR

FED.az xəbər verir ki, satışda Azərbaycan Respublikası Şirvan Apellyasiya Məhkəməsi, Xarici İşlər Nazirliyi, Müdafiə Nazirliyi və Fövqəladə Hallar Nazirliyinin balansında olan avtomobillər iştirak edir.

Şirvan Apellyasiya Məhkəməsinə məxsus 2022-ci il istehsalı olan KHAZAR SD markalı minik avtomobili 14 000 manat start qiyməti və 1 400 manat beh məbləği ilə satışa çıxarılıb.

Xarici İşlər Nazirliyinə məxsus 2019-cu il istehsalı olan üç ədəd KHAZAR PEUGEOT markalı avtomobil satışdadır. Onlardan biri üçün 9 225 manat, digərləri üçün isə hər biri 7 380 manat start qiyməti müəyyən edilib. Hər bir nəqliyyat vasitəsinin beh məbləği müvafiq olaraq 922,5 manat və 738 manat təşkil edir.

Müdafiə Nazirliyinə məxsus çoxsaylı yük və xüsusi təyinatlı avtomobillər də satış siyahısına daxil edilib. Siyahıda UAZ-3962, UAZ-31512, QAZ-3308, ZİL-131, URAL-375 və KamAZ-43114 markalı nəqliyyat vasitələri yer alır. Bu avtomobillərin buraxılış illəri 1982–2007 aralığını əhatə edir. Nazirliyin təqdim etdiyi nəqliyyat vasitələrindən biri — UAZ-3962 Xüsusi (2004-cü il buraxılışlı) 52 290 manat start qiyməti və 5 229 manat beh məbləği ilə satışa çıxarılıb, digər bir lotda isə KamAZ-43114 markalı yük avtomobili üçün 36 270 manat start qiyməti və 3 627 manat beh müəyyən edilib.

Bundan əlavə, Fövqəladə Hallar Nazirliyinə məxsus iki minik avtomobili də satışdadır. Bunlardan biri CHEVROLET NIVA 212300L (2006-cı il buraxılışlı) 3 300 manat start qiyməti və 330 manat behlə, digəri isə VAZ 21214 (2006-cı il buraxılışlı) 3 000 manat start qiyməti və 300 manat behlə təklif olunur.

Ümumilikdə satışa çıxarılan nəqliyyat vasitələrinin qiymətləri 3 000 manatdan 52 290 manatadək dəyişir. Maraqlanan şəxslər göstərilən əlaqəli şəxslərlə – Vəliyev Samir (0555028822), Nəzərli İstək (0502034101), Məhərrəmov İlyas (0707386161) və Əsədullayev Zaur (0503132876) ilə əlaqə saxlayaraq satış şərtləri barədə ətraflı məlumat əldə edə bilərlər.

Nəqliyyat vasitələri üzrə cərimə və məhdudiyyətlər ilə bağlı məsələlərin həlli balanssaxlayıcı təşkilatlar tərəfindən təmin olunmalıdır.
 1-ci sətirdə olan nəqliyyat vasitəsi 2-ci dəfə təkrar hərraca çıxarılır. 2-7-ci sətirdə olan nəqliyyat vasitələri 3-cü dəfə 10% endirimlə təkrar hərraca çıxarılır. 8-9-cu sətirdə olan nəqliyyat vasitələrinin satışı üzrə keçirilən hərracın nəticəsi ləğv edildiyindən nəqliyyat vasitələri 2-ci dəfə təkrar hərraca çıxarılır.
 Məlumatın dərc olunduğu gündən hərracda iştirak etmək istəyən şəxslərə satışa çıxarılan əmlak ilə qabaqcadan tanış olmaq imkanı balanssaxlayıcı təşkilat tərəfindən yaradılır.
Hərracda iştirak etmə qaydaları və nəqliyyat vasitələri haqqında məlumat əldə etmək üçün telefon: 311-01-60; (Daxili: 1758, 1709, 1706 və 1705)
 Sifarişlər Azərbaycan Respublikası İqtisadiyyat Nazirliyi yanında Əmlak Məsələləri Dövlət Xidməti Əmlak Xidmətləri Məkanında (Bakı şəhəri, Nizami rayonu, Xəlil Rza Ulutürk küçəsi 20) hərracın keçirilməsinə ən gec 3 (üç) bank günü qalanadək qəbul olunacaqdır: Nəqliyyat vasitələri barədə ətraflı məlumatı auksion.gov.az saytından almaq olar. Hərracda iştirak etmək üçün (elektron sifariş verənlər istisna olaraq) hərracın keçirilməsinə ən azı 3 bank günü qalanadək aşağıdakı sənədlər təqdim olunmalıdır:
1. Sifarişçinin şəxsiyyətini təsdiq edən sənəd (Hüquqi şəxslər üçün:notarial qaydada təsdiq olunmuş qeydiyyat şəhadətnaməsi, nizamnaməsi və VÖEN)
2. Azərbaycan Respublikası İqtisadiyyat Nazirliyi yanında Əmlak Məsələləri Dövlət Xidməti tərəfindən müəyyən edilmiş hesaba behin köçürülməsini təsdiq edən sənəd. (10% məbləğində beh Mərkəzi Bankda – AZ65NABZ01361150000000004944 nömrəli hesablaşma hesabına ödənilməlidir)
Hərrac günü sifarişçilərin hərrac zalına daxil olmaq üçün qeydiyyatı saat 09:45-dək aparılır.