Hafize Gaye Erkanın vəzifəsindən azad edilməsi ilə bağlı müraciətindən sonra, Türkiyə Cümhuriyyəti Mərkəzi Bankına (TCMB) yeni sədr təyin olunub.
Türkiyə Mərkəzi Bankı faizini - DAHA DA ARTIRDI
FED.az xəbər verir ki, "Rəsmi Qəzet"də dərc olunan Fərmana görə, Fatih Karahan yeni sədrdir.
Fərmanda, “Türkiyə Respublikası Mərkəzi Bankının sədri Hafize Gaye Erkan Prezidentin (Rəcəb Tayyib Ərdoğan - red) Fərmanı ilə vəzifəsindən azad edilib. Sədr müavini Fatih Karahan, Prezident Fərmanı ilə yeni sədr təyin edilib",- deyilir.
Hafize Gaye Erkanın sədrliyi ilə TCMB faizini 2023-cü ilin iyunundan 2024-cü ilin yanvarına qədər 8,50 faizdən 45 faizə qaldırıb.
Seçkilərdən sonra 9 iyun 2023-cü il tarixli Prezidentin Fərmanı ilə Hafize Gaye Erkan TCMB sədri vəzifəsinə təyin edilmişdi. O, Türkiyə Cümhuriyyəti Mərkəzi Bankının ilk qadın sədri olub.
Fatih Karahan kimdir?
1982-ci ildə Əskişəhərdə anadan olan Fatih Karahan 2006-cı ildə Boğaziçi Universitetinin Riyaziyyat və Sənaye Mühəndisliyi fakültəsini bitirib. 2012-ci ildə Pensilvaniya Universitetində İqtisadiyyat üzrə magistr və doktorantura təhsili alıb.
Karyerasına 2012-ci ildə Nyu York Federal Ehtiyat Bankında iqtisadçı kimi başlayan Karahan, 2022-ci ilə qədər sözügedən qurumda Əmək və Məhsul Bazarı Araşdırmaları rəhbəri və pul siyasəti müşaviri vəzifələrində çalışıb.
Kolumbiya Universitetində və Nyu York Universitetində yarımştat müəllim kimi də çalışan Karahan, 2022-ci ildə Amazonda baş iqtisadçı kimi işə başlayıb. Karahan 2022-ci ilin noyabrında Amazon-da baş iqtisadçı vəzifəsinə təyin edilib.
Karahan 28 iyul 2023-cü ildə Türkiyə Respublikası Mərkəzi Bankının sədr müavini vəzifəsinə təyin edilib.
"Məni vəzifədən azad edin"
Sabiq TCMB sədri Hafize Gaye Erkan sosial media hesabında paylaşım edərək vəzifəsindən azad olunmasını istəyib.
Erkan: “Hörmətli prezidentimizdən ilk gündən şərəflə yerinə yetirdiyim vəzifəmdən azad olunmağımı xahiş etdim”, bildirib. Xəzinə və maliyyə naziri Şimşək Erkanın qərarının tamamilə şəxsi olduğunu qeyd edərək, “Bu qərara hörmətlə yanaşıram və ölkəmizə verdiyi dəyərli xidmətlərə və töhfələrə görə ona təşəkkür edirəm” deyib.
Son vaxtlar Hafize Gaye Erkan qarşı nüfuzdan salma kampaniyası təşkil edilib: "Ailəmin və heç bir yaş yarımı olmayan günahsız övladımın bu prosesdən daha da mənfi təsirlənməsinin qarşısını almaq üçün cənab prezidentimizdən xahiş etmişəm ki, ilk gündən şərəflə yerinə yetirdiyim vəzifədən məni azad etsin".
Mərkəzi Bankın sədri Hafize Gaye Erkanın istefasından sonra xəzinə və maliyyə naziri Mehmet Şimşək yazılı açıqlama verib.
Açıqlamada aşağıdakı ifadələr yer alıb:
- Prezidentimiz Rəcəb Tayyib Ərdoğanın rəhbərliyi ilə həyata keçirilən iqtisadi proqramımız fasiləsiz və qətiyyətlə davam edir,
- Prezidentimiz iqtisadi komandamıza və həyata keçirdiyimiz proqrama tam dəstək və etimad göstərir. Mərkəzi Bankın keçmiş sədri Hafize Qaye Erkanın verdiyi qərar tamamilə şəxsi və öz mülahizələri ilə bağlıdır.
Qeyd edək ki, Türkiyə Prezident idarəetmə sisteminə keçdikdən sonra Mərkəzi Bankın sədri vəzifəsinə təxminən altı ildə 5 fərqli ad təyin edilib. Beş nəfərin hamısı dörd illik qanuni müddətini başa vurmadan vəzifəsini tərk etməli olub. Son üç ildə TCMB-ni tərk edən dörd sədr olub. (Marja)
