Azərbaycanda fəaliyyət göstərən kredit ittifaqlarının sayı ölkənin şəhər və rayonlarının sayından çox - 76 olsa da, heç də bütün bölgələrdə bu növ maliyyə qurumu yaradılmayıb.

FED.az xəbər verir ki, bu, "Renkinq"in apardığı araşdırma nəticəsində məlum olub.

Ölkədə ən çox kredit ittifaqı Beyləqan rayonundadır. Bu bölgədə 8 kredit ittifaqı fəaliyyətdədir.

Növbəti yerlərdə hər birində 7 kredit ittifaqının olduğu Bərdə və Cəlilabad rayonları qərarlaşıb.

Paytaxt Bakıda və İmişli rayonunda isə 6 kredit ittifaqı mövcuddur.

Digər şəhər və rayonlara gəlincə isə, Füzulidə 4, Gəncə, Saatlı, Şəki və Tovuzda 3, Ağcəbədi, Biləsuvar, İsmayıllı, Masallı, Salyan və Şərurda 2, Ağsu, Astara, Gədəbəy, Xaçmaz, Qax, Qazax, Qəbələ, Quba, Lənkəran, Naxçıvan, Sumqayıt, Şəmkir, Tərtər və Yardımlıda isə 1 kredit ittifaqı fəaliyyət göstərir.

Beləliklə, kredit ittifaqları Azərbaycanın 30 bölgəsini əhatə edir. İşğal altındakı 8 şəhər və rayon nəzərə alınmazsa, 36 bölgədə kredit ittifaqı yoxdur.