Gürcüstan hökuməti keçmiş məmurların axtarışı zamanı külli miqdarda pul və sənədlərin ələ keçirildiyini bildirib.
FED.az xəbər verir ki, Gürcüstanın Dövlət Təhlükəsizlik Xidməti şənbə günü keçmiş baş nazir İrakli Qaribaşvili, keçmiş baş prokuror Otar Partsxaladze, Dövlət Təhlükəsizlik Xidmətinin keçmiş rəhbəri Qriqol Liluaşvili və onlara yaxın olan digər səkkiz şəxsin evlərində ötən gün aparılan axtarışların təfərrüatlarını açıqlayıb.
Əməliyyat zamanı 24 evdə axtarışlar aparılıb, onlardan ümumilikdə 7 milyon dollardan çox və təxminən 140 milyon lari götürülüb.
“Həmçinin 198 bahalı əşya, qol saatı, rəsm və çertyojlar, bir neçə min vərəq sənəd, 50 mobil telefon və 119 elektron cihaz müsadirə edilib”, - deyə agentlik bildirib.
Əməliyyat oktyabrın 17-də, səhər saat 10:00-dan etibarən Tbilisi şəhəri ilə yanaşı, Dedoplistskaro, Vani, Çoxatauri və Borjomi rayonlarında da aparılıb. Ümumilikdə 24 ünvan və bir neçə şəxsi mülkiyyətdə axtarış həyata keçirilib.
Prokurorluq və Dövlət Təhlükəsizliyi Xidmətindən cəlb edilmiş təxminən 230 əməkdaşın iştirakı ilə gerçəkləşdirilən əməliyyatın nəticələri hazırda araşdırılır. İstintaq orqanları götürülmüş pulların və əşyaların mənşəyini müəyyən etmək üçün işlərini davam etdirir, sənədlər və elektron cihazlar üzərində texniki ekspertiza aparılır.
övlət Təhlükəsizliyi Xidməti Baş Prokurorluqla birlikdə həmin şəxslər barəsində növbəti qanuni tədbirlərin görülməsi üçün götürülmüş sənədlərin və elektrik cihazlarının məzmununu, habelə götürülmüş pul vəsaitlərinin faktiki mənşəyini öyrənir.
Xatırladaq ki, bir gün əvvəl, oktyabrın 17-də Gürcüstanın baş prokuroru Giorgi Qvarakidze bildirib ki, onun ofisi və korrupsiyaya qarşı mübarizə idarəsi cümə günü keçmiş yüksək vəzifəli məmurların evlərində axtarışlar aparıb. "Müxtəlif cinayət təhqiqatları çərçivəsində ölkə üzrə 22 yerdə axtarışlar aparılıb. Müxtəlif elektron cihazlar, sənədlər və külli miqdarda pul götürülüb", - Qvarakidze jurnalistlərə bildirib.
Onun sözlərinə görə, keçmiş baş nazir İrakli Qaribaşvili, Dövlət Təhlükəsizlik Xidmətinin keçmiş rəhbəri Qriqol Liluaşvili, keçmiş baş prokuror Otar Partsxaladze və onlarla əlaqəli olan 8 nəfərin evlərində axtarışlar aparılıb.
Müxalifət isə öz növbəsində iddia edir ki, yüksək vəzifəli məmurların evlərində axtarışlar hakim “Gürcü arzusu” partiyasının fəxri sədri Bidzina İvanişviliyə qarşı sui-qəsdlə əlaqələndirilə bilər, o, müxalifətin fikrincə, reallıqda Gürcüstanı 13 ildir təkbaşına idarə edir.
