Bugün Avrozonada İstehlak Qiymətləri İndeksinin dərc olunması ərəfəsində dollar avro qarşısında bir qədər bahalaşır. Ötən gün ərzində 1.1087 həddinə qədər bahalaşan EUR/USD valyuta cütlüyü, bugün 1.1074 səviyyəsində ticarət olunur. GBP/USD və USD/JPY valyuta cütlükləri müvafiq olaraq 1.2977 və 147.200 səviyyələrində qərarlaşıblar. Dollar indeksi 102.00 bənd səviyyəsindədir.
Bazar ertəsi, avqustun 19-da qızılın fyuçers qiymətləri bir unsiya üçün 2550$ səviyyəsinə yaxınlaşıb. Çikaqo Ticarət Birjasında (CME) dekabr ayı üzrə qızıl fyuçersləri qiyməti zirvəsində bir unsiya üçün 2549.9$-a qədər yüksəlib. Qızılın spot qiyməti isə tarixi maksimum olar 2509$ səviyyəsini test edib. Hal-hazırda dəyərli metal 2502$ səviyyəsində ticarət olunur. Qeyd etmək lazımdır ki, ilin əvvəlindən qızıl 20%-dən çox bahalaşıb. Bu dinamikaya mərkəzi bankların tələbi də kömək edib.
Çərşənbə axşamı səhər beynəlxalq birjalarda neftin qiyməti enir: Çində “qara qızıl”-a olan tələb ilə bağlı narahatlığın ardınca treyderlər Yaxın Şərqdə münaqişənin deeskalasiyasının mümkünlüyünü qiymətləndirirlər. “Brent” markalı neftin oktyabr ayı üzrə fyuçerslərinin qiyməti 0.8% ucuzlaşaraq bir barrel üçün 77.04$-a, “WTI” markalı neftin oktyabr ayı üzrə fyuçerslərinin qiyməti isə 0.75% ucuzlaşaraq 73.09$-a enib.
Bugün Avrozonada inflyasiyaya dair dərc olunacaq göstəricilər investorların diqqət mərkəzində olacaq əsas hadisələrdən biridir. Analitiklər hesab edirlər ki, Avrozonada illik inflyasiya, yekun hesablamaya görə, iyul ayında 2.5%-dən 2.6%-ə qədər artıb. Rəsmi məlumatlar avqustun 20-də, Bakı vaxtı ilə saat 13:00-da “Eurostat” statistika agentliyi tərəfindən dərc ediləcək.
Məlumat İnvest-AZ İnvestisiya Şirkətinin analitikləri tərəfindən hazırlanıb.
