Xəbər verildiyi kimi, bu gün dekabrın 7-də Baş nazir, Azərbaycan İnvestisiya Holdinqinin Müşahidə Şurasının sədri Əli Əsədovun sədrliyi ilə Holdinqin iclası keçirilib.

FED.az-ın məlumatına görə, ilasda müzakirə olunan məsələlərdən biri “Azərbaycan Xəzər Dəniz Gəmiçiliyi” QSC-nin hüquqi-korporativ strukturunun təkmilləşdirilməsi və istiqraz buraxılışı olub.

Xatırladaq ki, indiyədək dövlət şirkətləri arasında SOCAR dollar istiqrazları buraxıb. Şirkətin istiqrazları 2016 vf 2021-ci illərdə dövriyyəyə buraxılıb.

Hazırda isə qeyd edildiyi kimi, “Azərbaycan Xəzər Dəniz Gəmiçiliyi” QSC-nin hüquqi-korporativ strukturunun təkmilləşdirilməsi və istiqraz buraxılışı müzakirə edilir.

FED.az-ın məlumatına görə, “Azərbaycan Xəzər Dəniz Gəmiçiliyi” QSC dövlət şirkətləri arasında davamlı olaraq mənfəətlə işləyən qurumlardandır.

Belə ki, 2019-cu ildə şirkət ili 63,8 milyon manat, 2020-ci ildə 45 milyon manat, 2021-ci ildə isə 51,8 milyon manat xalis mənfəətlə tamamlayıb.

Bu dövrdə şirkətin öhdəlikləri davamlı olaraq azalmaqda davam edib.

Belə ki, “Azərbaycan Xəzər Dəniz Gəmiçiliyi” QSC-nin cəmi öhdəliklərinin həcmi 2019-cu ildə 234 milyon manat, 2020-ci ildə 230 milyon manat, 2021-ci ilin sonunda isə 202 milyon manat təşkil edib.

Hələlik qurumda hansı struktur dəyişikliklərinin aparılacağı açıqlanmır, bununla yanaşı, Transxəzər dəhlizinin gücünün artırılması məqsədilə şirkətin yeni gəmilər və infrastrukturla təmin ediləcəyi güman edilir.