"ABB (Azərbaycan Beynəlxalq Bankının) 2025-ci ilin 3-cü rübünün audit olunmamış maliyyə nəticələri artıq məlumdur. Bank 2024-cü ilin güclü maliyyə nəticələrini təkrarlamaq və hətta üstələmək istiqamətində irəliləyir. Əsas müşahidə ondan ibarətdir ki, kredit portfeli gözləniləndən daha yüksək templə artır. 2025-ci ilin 3-cü rübünün sonuna kredit portfeli 6.8 mlrd. AZN təşkil edir, bu da 451 mln. AZN (+7.1%) illik artım deməkdir. Artım, əsasən, istehlak kreditləri hesabına baş verib, portfel 11.1% artaraq 2 mlrd. AZN-ə çatıb, biznes kreditləri isə daha mülayim templə, 5.4% artaraq 3.3 mlrd. AZN olub. Ümumi artım tempi 2024-cü ilin 25%-lik sürətindən zəifləyib ki, bu da ötən ilin sürətli genişlənməsindən sonra bazarın normallaşmasını əks etdirir".

Qarabağın yeni bankirləri iş başında: «Hər gün 150-160 müştəriyə xidmət göstəririk» –MÜSAHİBƏ

FED.az xəbər verir ki, bunu “Moonwake Investment” şirkətinin Baş investisiya inzibatçısı, İnvestor Club-un təsisçisi Mansur Məmmədov bildirib.

Kredit riski və ehtiyatlar

Mansur Məmmədov qeyd edib ki, gözlənilən kredit itkiləri üzrə yaradılmış ehtiyatlar 84 mln. AZN təşkil edib və ötən ilin eyni dövrü ilə təxmini eyni səviyyədə qalıb. Lakin, bu il kredit portfeli daha yavaş templə artdığından nisbi risk dəyəri yüksəlib. Bu isə iqtisadi aktivliyin bir qədər zəifləməsinə və ya bankın daha konservativ ehtiyat siyasətinə işarə edə bilər.

Maliyyələşmə və balans strukturu

İnvestisiya üzrə ekspert hesab edir ki, ABB-nin möhkəm balansı ona artımı məhdudlaşdırmadan öhdəliklərini azaltmağa imkan verir. Bu il depozit portfelinin 12.6% azalaraq 8.6 mlrd. AZN-ə enməsi də bunu sübut edir. Daha kiçik depozit bazasının təsiri hələ tam əks olunmasa da, maliyyələşmə xərclərinin azalması nəticəsində marjanın (NIM) və mənfəətin 2025-ci ilin 4-cü rübü və 2026-cı ildə yaxşılaşacağı gözlənilir.

Kapital və mənfəətlilik

Mansur Məmmədovun sözlərinə görə, Bankın ümumi kapital adekvatlıq əmsalı 20% təşkil edir ki, bu da Mərkəzi Bankın tələb etdiyi 12% minimum səviyyədən xeyli yüksəkdir və gələcək artım üçün kifayət qədər bufer yaradır:

"Cari tendensiyalara əsasən, ABB ötən ilin xalis mənfəətini təkrarlamaq potensialına malikdir. Əgər dividend siyasəti dəyişməz qalarsa, hazırkı 0.27 AZN/səhmdə qiymətinə əsasən dividend gəlirliliyi təxminən 16% olacaq".

Qiymətləndirmə

İnvestor Club-un təsisçisi əlavə eib ki, Mansur Məmmədov ABB regiondakı analoji banklar – TBC Bank və Bank of Georgia ilə müqayisədə daha yüksək dividend gəlirliliyinə və oxşar mənfəət göstəricilərinə malikdir. Buna baxmayaraq ABB-nin səhmləri daha aşağı qiymətlə alınıb-satılır, səhmlərin real dəyəri daha yuxarıdır.

P/B 2025E: 0.53× (orta göstərici: 1.4×)

P/E 2025E: 3× (orta göstərici: 10×)

Bu fərq ABB-nin Bank-ın cəlbedici risk-gəlir nisbətinə və yerli kapital bazarlarında likvidlik artdıqca mümkün valyuta dəyərinin artması potensialına işarə edir.