Bakı Fond Birjasında (BFB) Azərbaycanın bank sektorunun lideri, ölkənin ən böyük bankı olan Azərbaycan Beynəlxalq Bankı  - ABB-nin istiqrazlarının yerləşdirilməsi baş tutub.

FED.az biznes və maliyyə xəbərləri portalı xatırladır ki, ABB-nin istiqrazlarının ticarətə buraxılması üçün “Ticarətə İcazə” qərarı Bakı Fond Birjasının (BFB) Listinq Komitəsi 3 mart 2026-cı il tarixində qəbul edilmişdi.

İstiqrazlara abunə yazılışı isə 04.03.2026-cı il tarixində başlayıb, 17.03.2026-cı il tarixində bitib. Martın 19-da isə istiqrazların (AZ2003004580 İSİN kodlu) yerləşdirilməsi baş tutub.

Qeyd olunan qiymətli kağızların ticarət nəticələri “Bakı Fond Birjasında Qiymətli Kağızların Ticarətə Qəbulu, Listinqə Alınması, Listinqdə Saxlanılması və Delistinqi Qaydaları”-n  3.19  bəndinin tələblərinə cavab verdiyindən, adıgedən istiqrazlar Standart Bazar Listinq seqmentinə alınır.

Xatırladaq ki, emissiya çərçivəsində hər birinin nominal qiyməti 100 manat olan 50 000 ədəd, ümumilikdə 5 milyon manatlıq  istiqraz buraxılıb. İstiqrazların illik gəlirliyi 11% təşkil edir ki, bu da bəzi bankların əmanət faizlərindən artıqdır.

Şərtləri görə 2 il dövriyyədə olacaq istiqrazlar üzrə faizlər 3 ayda bir dəfə ödəniləcək.

ABB-nin istiqrazlarını yerləşdirilməsi investorların ABB-yə böyük etimadını növbəti dəfə nümayiş etdirib. İstiqrazların yerlşədirilməsi zamanı investorların böyük aktivliyi müşahidə olunub.

Belə ki, 277 investor tərəfindən 352 sifariş qəbul edilib. Emissiya həcmi 5 milyon manat olduğu halda, ümumi sifarişlərin həcmi 27 milyon manatı keçib.

Xatırladaq ki, buraxılışın anderrayteri «ABB-İnvest İnvestisiya Şirkəti» QSC olub.