Qlobal Ətraf Mühit Fondu və Azərbaycan Ekologiya və Təbii Sərvətlər Nazirliyinin artıq bir neçə ildir həyata keçirdiyi BMT-nin İnkişaf Proqramı tərəfdən icra edilən “Böyük Qafqaz landşaftında davamlı torpaq və meşə idarəçiliyi“ layihəsi uğurla davam edir. “ABAD” publik hüquqi şəxs də öz sırasında bu cür ölkə miqyasında ekoloji cəhətdən vacib olan layihəyə qatılmaya bilməzdi.
Layihəyə əsasən “ABAD” “Yerli yüksək dağlıq ərazilərin icmalarının alternativ gəlir mənbələri ilə təmin edilməsi” tenderinə qalib gələrək Azərbaycanın İsmayıllı və Şamaxı rayonlarının ucqar dağ kəndlərində ətraf mühitə ziyan vurmayan 14 sahibkarlıq subyektləri yaradacaq.
Belə ki, “ABAD” İsmayıllının Brodval, Əhən, Sumağallı kəndlərindən dəstək proqramına qatılacaq ailələrin ilkin seçiminə başlayıb. Hazırda bu ailələrin ehtiyaclarının müəyyənləşdirilməsi üzrə aktiv şəkildə iş gedir, ilk ailə brendləri yaradılıb. Şamaxıda da, həmçinin, ailələrin seçimi üzrə işlər gedir.
Onu da qeyd edək ki, layihə 2018-ci ilin mart ayınadək davam edəcək.
Xatırladaq ki, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində “ABAD” publik hüquqi şəxs Azərbaycan Respublikası Prezidenti İlham Əliyevin 23 sentyabr 2016-cı il tarixli Fərmanı ilə yaradılıb. “ABAD” mərkəzləri tərəfindən dekorativ-tətbiqi xalq sənətkarlığı və kənd təsərrüfatı sahəsində fəaliyyət göstərən ailə bizneslərinə dəstək layihələri həyata keçirilir.
