“Azərxalça” Açıq Səhmdar Cəmiyyətinin müraciəti əsasında Azərbaycan Standartlaşdırma İnstitutu tərəfindən xalçaların “Azərxalça” ASC tərəfindən istehsal olunduğunu təsdiq edən uyğunluq sertifikatı verilib və “Əl ilə toxunmuş Azərbaycan xalçalarının texniki şərtləri” qəbul edilib.
FED.az xəbər verir ki, bunu mətbuata açıqlamasında Səhmdar Cəmiyyətin mətbuat xidmətinin rəhbəri Tural Səfərov deyib. O bildirib ki, ilk dəfə tətbiq olunan texniki şərtlər 5 il müddətində qüvvədə olacaq. Bu texniki şərtlər xalq təsərrüfatı ehtiyacları və ixracat üçün hazırlanmış əl ilə toxunmuş xovlu və xovsuz Azərbaycan xalçalarına şamil edilir. Texniki şərtlər sertifikatlaşdırma məqsədi üçün istifadə oluna bilər və tələbləri məcburidir.
Eləcə də bax: Hesablama Palatası “Azərxalça”da - YOXLAMA APARIB
Tural Səfərov deyib ki, yeni qəbul edilən normativ sənəddə xalça istehsalı zamanı texniki tələblər, xalçaların qəbul qaydaları, saxlanması, markalanması, qablaşdırılması, nəqliyyatla daşınması, ayrı-ayrı xalça qrupları üzrə xalçanın toxunmasında istifadə olunan materiallar, xalçanın texniki göstəriciləri və ölçüləri haqqında məlumatlar öz əksini tapıb. Xalçanın sıxlığı, qıraqbükməsi, dəhnəsi, xovunun qalınlığı üzrə konkret tələblər müəyyənləşdirilib. Toxunan xalçaların minimum eni 50 sm-dən maksimum 405 sm-ə kimi, minimum uzunluğu 50 sm-dən maksimum 620 sm-ə qədər olmalıdır.
Normativ sənəddə göstərilir ki, xalçaların texniki rəsmlərsiz yerli motivlər əsasında toxunmasına yol verilir, onlar toxunma nəticəsindən asılı olaraq birinci və ikinci növə bölünür. Əl ilə toxunmuş Azərbaycan xalçaları qüvvədə olan normativ sənəd üzrə pambıq, yun, parça ipliyindən, sərtdişli təmiz yunlu xalça ipliyindən, qarşıq və təmiz yunlu aparat ipliyindən hazırlanmalıdır.
Xalçaların yuyulmasından satışa çıxarılmasınadək olan mərhələdə görülən işlər, istehlakçının zəmanəti də normativ sənəddə qeyd olunub.
“Çeşidlənmiş çirkli yunun nəmlik itkisi barədə standart da müəyyən edilib. Tədarük edilmiş çirkli yunun çeşidləndikdən sonra ümumi çəkisində baş verən nəmlik itkisi 20%-ə bərabərdir. “Azərxalça”nın regional yun və boyaq bitkilərinin tədarükü məntəqələrinə qəbul edilmiş çirkli yunun çeşidləndikdən sonra Yunəyirici-Boyaq Fabrikinin xammal anbarına təhvil verilənədək saxlanılması zamanı baş verən nəmlik itkisi 3 faiz, çeşidlənmiş yunun fabrikin xammal anbarına qəbul edilib emal olunanadək saxlanılması zamanı baş verən nəmlik itkisi isə 17 faizdir”- deyə Tural Səfərov əlavə edib.
Onun sözlərinə görə, “Azərxalça” artıq filiallarda xalça istehsalını, regional məntəqələrə və fabrikə yun qəbulunu bu texniki şərtlərə uyğun həyata keçirir.
