Palladyum qiymətləri 1500 dolları aşaraq rekord qırıb, qızıl qiymətləri 10 ayın ən yüksək səviyyəsinə qalxıb
FED.az xəbər verir ki, benzin ilə işləyən avtomobillərdə emissiya nəzarətini təmin edən hissənin (katalizator) istehsalında istifadə edilən palladyum qıtlaşıb. "Marja" xəbər verir ki, bununla əlaqədar olaraq palladyumun unsiyasının qiyməti 1500 dolları aşaraq rekord səviyyəyə çatıb. Qiymətlərdəki bu yüksəliş, Rusiya və Cənubi Afrikadakı böyük istehsalçıları sevindirir.
Palladyumun qiyməti 1.7 faiz yüksələrək unsiyası 1505.46 dollara qədər qalxıb. Qiymətlər ardıcıl yeddinci aydır qalxır.
Qızılın unsiyasının qiyməti isə 0.4 faiz yüksələrək 1346.80 dolları görüb. Bu, son 10 ayın ən yüksək səviyyəsidir.
"Citigroup Inc", palladyum qiymətlərinin bu ay daha da yüksələcəyini qeyd edərək, bazarın yalnız bir "şok" ilə tarazlığa qovuşa biləcəyini və 1600 dollar səviyyəsinə qalxa biləcəyi barədə xəbərdarlıq edib.
Avtomobillərin ekoloji təmizliyini təmin edən katalizatorların mühüm istehsalçılarından biri olan "Conson Matthey Plc", qlobal qıtlığın bu il "dramatik bir şəkildə" artdığını qeyd edib. Avtomobil bazarının dizel vasitələrdən uzaqlaşması benzin avtomobillərə tələbin artmasına səbəb olub.Benzin avtomobillərinin istehsalının artması palladyuma da tələbi artırıb.
Növbəti bir neçə ildə palladyum istehsalının artacağı gözlənilmir. Bazardakı qıtlıq davam edəcək və qiymətlər yüksəlməkdə davam edəcəkdir.
©Marja
