"Yaxın 5 il ərzində Azərbaycanda nar sahələrinin 4 min hektara qədər artırılması nəzərdə tutulub".
FED.az xəbər verir ki, bunu Azərbaycan Nar İstehsalçıları və İxracatçıları Assosiasiyasının sədri Fərhad Qaraşov bildirib.
Onun sözlərinə görə, 2018-ci ildə Azərbaycanda 170 min tona qədər nar istehsal olunub və 9 300 tona yaxın nar meyvəsinin ixracı həyata keçirilib: “Əsas hədəflərimiz nar meyvəsinin daha çox istehsal olunmasıdır, nardan hazırlanmış çaxırın, nar şirələri, nar kompotu və narşərabın və digər meyvələrlə qarışdırılmış digər məmulatların da istehsalın nəzərdə tutulmasıdır”.
F. Qaraşov bildirib ki, 2019-cu ilin çiçəklənmə dövrü artıq başlayıb: “Bir çox sahələrlə tanışlıqdan sonra assosiasiyaya məlumatlar daxil olur ki, çiçəklərdən doğan narlar normal vəziyyətdədir. Onların becərilməsi üçün ziyanvericilərə qarşı mübarizə üçün təlimlər hazırda davam edir. Hazırda 23 800 hektara yaxın nar bağı əkin altındadır. Kənd Təsərrüfatı Nazirliyi tərəfindən hazırlanmış yeni dövlət proqramına əsasən, yaxın 5 il ərzində bu rəqəmin 4 min hektara qədər artırılması nəzərdə tutulub. Bu sahələrin 28 min hektara yaxınlaşdırılması nəzərdə tutulub”.
Assosiasiya sədri bildirib ki, bu il üçün hər hektara düşən məhsuldarlıq 15 ton olması nəzərdə tutulur: “2018-ci ildə hər hektarda məhsuldarlıq 7 ton təşkil edib. Bu bizim üçün çox aşağı nəticədir. Bunun da birbaşa fermerlərin maarifləndirilməsi və torpaqdan başlayan problemlərlə bağlıdır. Yəni problemlər daha çox elmə əsaslanıb, torpağın analizlərindən, ağacların yaşı və keyfiyyətindən, onlara düzgün qulluqdan, ziyanvericilərə qarşı düzgün mübarizədən başlamaq lazımdır. Narçılığın inkişaf etdiyi ən qabaqcıl ölkələrə - Türkiyə, Misir, İsrail, İspaniya, Hindistan və İranın təcrübəsinə nəzər salsaq, görəcəyik ki, bu ölkələrdə hər hektara düşən məhsuldarlıq 20-35 ton arasında dəyişilir”.
Assosiasiya sədri vurğulayıb ki, bu səbəbdən də Azərbaycan bu ölkələrin anoloji qurumları ilə əməkdaşlıq etmək niyyətindədir: “Yaxın zamanlarda Azərbaycan Nar İstehsalçıları və İxracatçıları Assosiasiyası Türkiyə nar istehsalçıları ilə əməkdaşlığa başlayacaq”.
O həmçinin qeyd edib ki, artıq assosiasiyanın 170-ə yaxın üzvü var və bu il üzvlərin sayının 200-ə çatdırılması planlaşdırılır.
