“AzerGold” Qapalı Səhmdar Cəmiyyəti (QSC) tərəfindən istehsal edilən qızıl və gümüş tərkibli xəlitələrin saflaşdırılması və xarici bazarda satışı məqsədi ilə 2017-ci ildən etibarən əməkdaşlıq etdiyi İsveçrənin beynəlxalq nüfuzlu affinaj şirkəti “Argor-Heraeus”un təmsilçiləri ölkəmizdə səfərdə olublar.
Prezident «AzerGold»u digər şirkətlərə - NÜMUNƏ GÖSTƏRDİ
FED.az xəbər verir ki, səfər London Qiymətli Metallar Bazarı Assosiasiyasının üzvü olan “Argor-Heraeus” şirkətinin həmin Assosiasiyanın “Məsuliyyətli Təchizatçı” Proqramı çərçivəsində həyata keçirilib. Şirkətin nümayəndələri QSC-nin baş ofisində müxtəlif görüşlər keçirib, həmçinin Daşkəsən rayonunda yerləşən Çovdar İnteqrəolunmuş Regional Emal Sahəsini ziyarət ediblər.
Beynəlxalq şirkətin vitse-prezidenti, Qlobal biznes bölməsinin Maliyyə direktoru Frank Mohrhardt və Keyfiyyətə nəzarət üzrə rəsmisi Maryana Cheterbok QSC-nin fəaliyyətini beynəlxalq tələblər və şəffaflıq meyarları üzrə qiymətləndiriblər. Belə ki, qonaqlar hasilat və istehsalat prosesi, ətraf mühitin mühafizəsi, sağlamlıq və əməyin təhlükəsizliyi, işçilər üçün yaradılmış əmək şəraiti və digər istiqamətlər üzrə görülən işlərlə əyani tanış olublar.
Audit heyəti “Çovdar” qızıl mədəninin yaxınlığında yerləşən kəndlərin sakinlərinin növbəti səyyar tibbi müayinə aksiyasının həyata keçirildiyi düşərgəni də ziyarət edib, müayinə prosesini izləyib, yerli sakinlər arasında müxtəlif sorğular keçiriblər. Qonaqlar QSC-nin korporativ sosial məsuliyyət sahəsində icra etdiyi layihələr haqqında məlumatlar toplayaraq təhlil ediblər. Yoxlamanın ilkin nəticəsi olaraq müsbət rəyin formalaşdığı qeyd edilib, “AzerGold”un fəaliyyətinin beynəlxalq mədənçilik standartları, norma və prinsipləri çərçivəsində təşkil edildiyi vurğulanıb.
Məlumat üçün qeyd edək ki, beynəlxalq təcrübəyə uyğun olaraq nüfuzlu affinaj şirkətləri hasilatçı şirkətləri müxtəlif meyarlar əsasında araşdırır, dünya səviyyəsində tətbiq olunan əsas tələblər – KYC (Know Your Customer – Müştərini Tanı) və “Due Diligence” (hüquqi ekspertiza) prosedurları üzrə müxtəlif mərhələli yoxlamalardan keçirirlər. Yalnız bütün standartlara cavab verdiyi müəyyən edildikdən sonra şirkətə hasil edəcəyi xəlitələri saflaşdıra biləcəkləri barədə müsbət rəy verilir. Xatırladaq ki, “AzerGold” QSC-yə müvafiq müsbət rəy 2017-ci ildə təqdim edilib.
