Sənaye

Elektrik enerjisi kabelləri istehsalında özbaşınalıqdır

Elektrik enerjisi kabelləri istehsalında özbaşınalıqdır | FED.az
11:06 15 Okt 2018

Elektrik enerjisi kabelləri istehsalında və satışında özbaşınalıqdır.

Alıcılar bildirirlər ki, 100 metr adı ilə aldıqları kabellərin topu 90-92 metr çıxır. Alıcılar metrə oyunu ilə aldadılır.

“8-ci kilometr” bazarında kiçik araşdırma iddiaların doğru olduğunu göstərir. Satıcılar özlər etiraf edirlər ki, üzərində 100 metr yazılan mis kabellərin topu əslində 90-92 metrdir.

“Bəzi kabellərin topunda 90 mterdən də aşağı olur. Bu bizlik deyil, istehsalçıdan bu şəkildə alırıq. Bu və digər hiylələr ilə alıcılar aldadılır və ya aşağı qiymətlər təklif edirlər”.

Bazarda yerli istehsal “4-lük” (4 mm) kabellər 40-48 manat, “2,5-lik” (2,5 mm) kabellər isə 30-35 manat civarındadır. Satıcılar bildirdilər ki, Türkiyə kabeli adı ilə satılan kabellərin çoxu yerli istehsaldır:

“Misin qiymətini, gömrük rüsumlarını, nəqliyyat xərclərini hesabladıqda Türkiyədən idxal edilən “4-lük” kabelin topunun 45-50 manata satılması mümkün deyil”, - satıcılardan biri dedi.

Satıcılar qeyd edir ki, xammlallar Türkiyədən gətirilərək kabellər Azərbaycanda istehsal edilir.

Bazarda Türkiyə və Rusiyada  istehsal olunmuş kabellər də satılır. Bu kabellər daha bahalıdır. Türkiyə istehsalı “4-lük” kabelin topunun qiyməti 75-80 manat, “2,5-lik” kabelin topunun qiyməti isə 60-65 manatdır. Satıcılar qeyd edir ki, Türkiyə istehsal kabellərini topu təmiz 100 metrdir.

Alıcılar, kabel istehsalındakı özbaşınalığa İqtisadiyyat Nazirliyinin son qoymasını istəyirlər.

 

NAZİRLİK 2011-Cİ İLDƏ HİYLƏNİ AŞKAR ETMİŞDİ

2011-ci ilin Oktyabr ayında keçmiş İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti Xırdalan şəhəri, Aşıq Ələsgər küçəsi, 5 ünvanında "Birlik" MMC-yə məxsus istehsalat sahəsində yoxlama aparmışdı.

Yoxlama zamanı müəssisədə istehsal edilən, polietilen qablaşdırmada olan 1167 ədəd elektrik naqillərinin etiketlərində ölçüyə dair məlumatın yanlış göstərilməsi ilə istehlakçıların aldadılması halına yol verildiyi müəyyən olunmuşdu. Qablaşdırılmış həmin elektrik naqillərinin hər birinin üzərində naqillərin uzunluğunun 100 metr olması göstərildiyi halda, "Ünal kablo", "Simtel kablo", "Aytel kablo", "Tümka" adlı naqillərin faktiki uzunluğunun 80-90 metr olduğu aşkar edilmişdi. Yoxlama zamanı, həmçinin həmin naqillərin etiketlərinin üzərində istehsalçı müəssisə barədə məlumatın qeyd edilmədiyi müəyyən olunmuşdu.

Yol verilmiş qanun pozuntuları ilə əlaqədar, polietilen qablaşdırmada olan 1167 ədəd elektrik naqillərinin satışının dayandırılması və müəssisə tərəfindən ticarət şəbəkəsinə paylanmış bu cür malların geri yığılması barədə "Birlik" MMC-yə icrası məcburi göstəriş verilmişdi.

Digər xəbərlər