Regionlar

Gün ərzində 800 heyvan kəsib, xaricə ixrac edəcək - MAYDA İŞƏ DÜŞƏCƏK

Gün ərzində 800 heyvan kəsib, xaricə ixrac edəcək - MAYDA İŞƏ DÜŞƏCƏK | FED.az
15:47 1 May 2019

Xaçmaz rayonunda tikilən yeni heyvan kəsim məntəqəsi may ayında istifadəyə veriləcək.

FED.az xəbər verirki, bu müəssisədə gün ərzində 500 baş xırdabuynuzlu və 300 baş iribuynuzlu heyvan kəsmək mümkün olacaq.

Tikintisinə noyabr ayından başlanılan müəssisə 0,5 hektar ərazini əhatə edir. Burada kəsim məntəqəsi ilə yanaşı, inzibati bina, soyuducu təsərrüfatlar, kameralar, ətin doğranması sexləri və satış mərkəzi fəaliyyət göstərəcək.

Son tamamlama işləri başa çatdıqdan sonra məntəqədə Türkiyə və Almaniyadan gətirilən avadanlıqlar quraşdırılacaq.

Sahibkar Əbülfət Məmmədov bildirib ki, müəssisə fəaliyyətə başlayandan sonra xaricə heyvan əti ixracı nəzərdə tutulub. Artıq İsrail, İran, Küveyt, Birləşmiş Ərəb Əmirlikləri və Çin şirkətləri ilə ilkin danışıqlar aparılıb. Həmin ölkələrin nümayəndələri Azərbaycandan heyvan əti almaqda maraqlıdır.

Müəssisədə kəsilmiş heyvanların əti ilə yanaşı dərisi, baş-ayağı, içalatı, hətta qanı da emal olunaraq müvafiq qaydada satılacaq.

Xaçmaz rayonunda tikilən yeni heyvan kəsim məntəqəsində 50 nəfər işlə təmin ediləcək.

Bu kimi ət satışı məntəqələrinin yaxın gələcəkdə digər bölgələrdə də açılması nəzərdə tutulur. Məqsəd ölkə ərazisində heyvan kəsimi və satışının müasir tələblərə uyğunlaşdırılması, qanunsuz heyvan kəsimi və satışı fəaliyyətinin qarşısının alınması, istehlakçıların hüquqlarının müdafiəsidir.

Qida Təhlükəsizliyi Agentliyi müvafiq icra hakimiyyəti orqanları ilə birlikdə prosesə sahibkarları da cəlb etməklə qida təhlükəsizliyinin təmin olunması sahəsində tədbirləri sistemli və kompleks şəkildə həyata keçirir. Agentlik ölkə üzrə baytarlıq-sanitariya və sanitariya-gigiyena tələblərinə uyğun müasir stasionar, modul və mobil tipli heyvan kəsimi məntəqələrini yaratmaq istəyən sahibkarları əməkdaşlığa dəvət edir.

Digər xəbərlər