“Azərbaycan Dəmir Yolları” (ADY) QSC işəilərin işə qəbulu qaydaların dəyişib.
Qurumdan FED.az-a verilən məlumata görə, yeniliklər dəmiryolunun yeni inkişaf strategiyasına uyğun olaraq həyata keçirilir.
Burada proseslərin səmərəli təşkil olunması və avtomatlaşdırılması ilə əlaqədar olaraq dəmir yollarının ehtiyacları, işçi heyətinə olan real tələbat və kadr potensialının inkişaf perspektivləri yenidən qiymətləndirilir.
“Azərbaycan Dəmir Yolları” bildirir ki, hazırda qurumdakı boş iş yerlərinə daxili kadrlar götürülür. Eyni zamanda işə qəbul prosesini tam avtomatlaşdırmaq, təlimlər vasitəsilə əməkdaşları inkişaf etdirmək üçün işlər aparılır. Dəmir yolu operatoru quruma işçilərin qəbulu qaydalarını da açıqlayıb.
ADY-də işə qəbul Azərbaycan Respublikasının əmək qanunvericiliyinin tələbləri nəzərə alınmaqla, Cəmiyyətin müvafiq sahədə daxili sənədlərinə uyğun olaraq müsabiqə yolu ilə həyata keçirilir. Müsabiqə prosesi müraciətlərin ilkin seçimi, namizədlərin test imtahanlarında iştirakı və müsahibə olmaqla 3 mərhələdən ibarətdir.
ADY-də avtomatlaşdırılmış işə qəbul sisteminin tətbiqində məqsəd müsabiqələrdə şəffaflığı və obyektivliyi təmin etməkdir. Belə ki, ilkin seçim mərhələsində namizədlərin göstəricilərinin vakansiyanın tələblərinə uyğunluğu sistem tərəfindən insan müdaxiləsi olmadan tam avtomatik şəkildə həyata keçirilir. Müsabiqə prosesi dövründə məlumat mübadiləsini operativ təmin etmək məqsədi ilə namizədlərə “sms” bildirişlər göndərilir. Test imtahanı mərhələsində isə imtahan nəticələri dərhal ekranda əks olunmaqla yanaşı namizədlərin birbaşa elektron poçt ünvanlarına da göndərilir.
Test mərhələsi Bakı şəhərində ADY-nin Test Mərkəzində, regionlarda isə qurumun müvafiq inzibati binalarında daşına bilən elektron cihazlar vasitəsilə həyata keçirilir.
Müsahibə mərhələsində iştirak edən namizədlər müvafiq meyarlar əsasında qiymətləndirilir və proses video qeydiyyata alınır.
Əməliyyatların fasiləsizliyinin təmin edilməsi və vakansiyaların təcili komplektləşdirilməsi məqsədi ilə ADY-də daxili və xarici Kadr Ehtiyat Bazaları (KEB) yaradılmışdır. Müvafiq vakansiya üzrə müsahibəni uğurla keçən və ən yüksək bal toplayan namizədə iş təklifi olunur, daha az bal toplayan, lakin keçid balını toplayan namizəd (lər) isə KEB-ə daxil edilir. Müvafiq vakansiya yarandığı təqdirdə öncə daxili kadr ehtiyatı bazasına müraciət olunur, vakansiya (lar) komplektləşdirilə bilinmədiyi təqdirdə xarici kadr ehtiyatı bazasına müraciət edilir.
Qeyd edək ki, 2023-cü ilin I rübünə əsasən, ADY-də elektrik və hərəkət tərkibinin idarəedilməsi sahələri üzrə vakansiyalara daha çox ehtiyac yaranıb.
Dövlət Məşğulluq Agentliyi ilə əməkdaşlıq üzrə 89 nəfər işsiz vətəndaş ADY-də kurslara cəlb edilib, onların 34 nəfəri hazırda ADY-ya işə qəbul edilib.
Ali və peşə təhsili müəssisələri ilə əməkdaşlıq çərçivəsində 2023-cü ilin I rübündə 67 ali və 25 peşə təhsilli gənc ADY-yə işə qəbul edilib.
ADY rəhbərliyi tərəfindən korporativ sosial məsuliyyət proqramı çərçivəsində müharibə iştirakçıları, qazilər və şəhid ailələrinə daim xüsusi həssaslıqla yanaşılır, belə ki, hazırda Cəmiyyətdə 53 şəhid ailəsinin üzvü, I və II Qarabağ müharibələrinin 829 iştirakçısı çalışmaqdadır.
