«Azercell» şirkəti «Premium» tarif paketlərini yeniləyir. 1 oktyabr 2024-cü il tarixindən qüvvəyə minən dəyişiklik çərçivəsində abunəçilərə seçdikləri “Premium” tarifinə əsasən ölkədaxili danışıq üçün 3000-5000 dəqiqə təqdim edilir.
FED.az xəbər verir ki, dəyişikliklər qüvvəyə mindikdən sonra «Premium» paketləri daha sərfəli və əlverişli olacaq.
Qeyd edək ki, «Azercell»in həm Fakturalı, həm də Fakturasız xətt abunəçilərinə 3 fərqli «Premium» tarif paketi təqdim olunur: Premium 50GB (aylıq 59 AZN), Premium 75GB (aylıq 79 AZN), Premium 100GB (aylıq 99AZN).
Bu paketlərə müvafiq olaraq 50 GB, 75 GB və 100 GB internet, şəbəkəxarici və şəbəkədaxili danışıqlar üçün dəqiqələr, «WhatsApp» və «Facebook Messenger» ilə mətn yazışmaları üçün 1 GB internet, eləcə də rouminqdə istifadə üçün paketin həcmindən asılı olaraq 1 GB, 2 GB və 3 GB internet daxildir.
Yenilənmiş paketlərdə internet həcmi dəyişmir, eyni zamanda danışıq üçün daha sərfəli şərtlər təqdim edilir. Belə ki, daha öncə bu paketlər çərçivəsində şəbəkədaxili və şəbəkəxarici danışıqlar üçün nəzərdə tutulan dəqiqə həcmi fərqlənirdi, lakin indi abunəçilərə ölkədaxili danışıqları əhatə edən ümumi bir paket təqdim edilir. Bununla da, “Premium” istifadəçilərinə Azercell abunəçilərinə edilməyən zəngləri də rahat və əlverişli şərtlərlə həyata keçirmək imkanı verilir. Həmçinin müştərilər danışıq balansını daima yoxlamaq məcburiyyətində qalmır.
Yeni şərtlərə əsasən Premium 50GB istifadəçilərinə aylıq 50 saat ölkədaxili (3000 dəqiqə), Premium 75GB istifadəçilərinə aylıq təxminən 67 saat ölkədaxili (4000 dəqiqə), Premium 100GB istifadəçilərinə isə aylıq təxminən 83 saat ölkədaxili (5000 dəqiqə) danışıq imkanı verilir.
Şirkətin mətbuat xidmətindən aldığımız məlumata əsasən bu dəyişikliklər sözügedən tarif istifadəçilərinin ortalama danışıq müddəti nəzərə alınmaqla həyata keçirilib.
