Banner

Dövlət

Gömrük Komitəsi "Grant Aqro Servis"in şikayəti ilə bağlı - MƏLUMAT YAYDI

Gömrük Komitəsi "Grant Aqro Servis"in şikayəti ilə bağlı - MƏLUMAT YAYDI | FED.az
18:42 24 İyun 2020

Dövlət Gömrük Komitəsi "Grant Aqro Servis" MMC-nin rəhbəri Babayev Fərhad Vidadi oğlunun açıqlaması ilə bağlı məlumat yayıb.

Qurumdan FED.az-a daxil olan məlumatda bildirilir ki, bəzi kütləvi informasiya vasitələrində yayımlanan və "Grant Aqro Servis" MMC-nin rəhbəri Babayev Fərhad Vidadi oğluna məxsus olduğu bildirilən açıqlamada Dövlət Gömrük Komitəsinə, onun rəhbərliyinə qarşı həqiqətə uyğun olmayan, haqsız ittihamlar irəli sürülür. 

Xatırladaq ki, "Grant Aqro Servis" MMC-nin rəhbəri Fərhad Babayev Komitə sədri Səfər Mehdiyə müraciət edərək ölkəyə idxal zamanı qarşılaşdığı problemi həll etməyə çağırıb. 
İş adamı bildirib ki, 15 iyun 2020-ci il tarixdə 42 ədəd motosklet (bağçılıqda istifadə olunan) hissələrə sökülmüş vəziyyətdə, 1 ədəd yük maşınında Azərbaycan Respublikasının ərazisinə daxil olub və məcburi olaraq AVELA MMC-yə (Bakı ş, Babək pr 92, mənz 23) məxsus gömrük terminalına yönləndirilib. İş adamı bildiri ki, mallarının anbar ərazisindən çıxarılmasına qeyri-qanuni maneələr yaradılır, heç yerdə qeyd olunmayan, əsaslandırılmayan yüksək haqq tələb edilir. 

Gömrük Komitəsində isə bu ittihamları təkzib edirlər: "Belə ki, həmin şəxs idxal etdiyi mallara görə terminalda ondan qanunvericilikdə nəzərdə tutulmayan ödənişlərin tələb edildiyini bildirir, buna görə gömrük orqanlarını günahlandırır və Dövlət Gömrük Komitəsinə etdiyi müraciətlərə cavab verilmədiyini iddia edir.

Dövlət Gömrük Komitəsi bildirir ki, həmin terminal Komitənin sisteminə daxil olan qurum deyil və burada göstərilən xidmətlərin növü, dəyəri sahibkarla terminal sahibi tərəfindən tənzimlənir. Üstəlik sahibkarların, o cümlədən Fərhad Babayevin mallarını daşıyan yük nəqliyyat vasitlərinin gömrük orqanları tərəfindən məcburi qaydada həmin dayanacağa yönləndirilməsinə dair iddialar tamamilə əsassızdır"-deyə komitənin açıqlamasında bildirilir.

Gömrük Komitəsi bildirir ki, məsələ ilə bağlı gömrük orqanlarına edilən müraciətlərin cavabsız qalması barədə deyilənlər isə həqiqətə uyğun deyil: "Belə ki, "Grant Aqro Servis" MMC-nin rəhbəri Babayev Fərhad Vidadi oğlu adından Dövlət Gömrük Komitəsinin Çağrı Mərkəzinə, ümumiyyətlə müraciət olunmayıb. Həmin şəxsin imzası ilə 20 iyun 2020-ci il tarixdə Dövlət Gömrük Komitəsinə daxil olan teleqram isə Komitənin aidiyyəti qurumları tərəfindən 22 iyun 2020-ci il tarixdə cavablandırılıb və məktubda qaldırılan məsələnin Komitənin səlahiyyətlərinə aid olmadığı bildirilib. Üstəlik həmin şəxsə məsələyə hüquqi qiymət verilməsi üçün aiddiyəti qurumlara müraciət etmək də tövsiyə olunub.

Bir məsələni xüsusi vurğulamaq yerinə düşər ki, xarici iqtisadi fəaliyyətlə məşğul olan şəxslərin gömrük orqanları ilə təması gömrük rəsmiləşdirilməsi yekunlaşdırılaraq mallara buraxılış verildiyi anda başa çatır. "Grant Aqro Servis" MMC-nin də idxal etdiyi malların müvafiq əməliyyatlar həyata keçirilərək gömrük orqanı tərəfindən sahibinə verildiyini nəzərə alsaq demək ki, Fərhad Babayev adlı şəxs ya ünvanı səhv salıb ya da gömrük orqanlarının fəaliyyətinə kölgə salmaq məqsədi güdür".

"Əks halda hər hansı fakta söykənmədən, qanuni əsas olmadan bəzi dırnaqarası saytlarda gömrük orqanlarını və onun əməkdaşlarını “özbaşınalıqda”, sahibkarlara “maneə” yaratmaqda, müraciətlərə “etinasız” yanaşmaqda, hətta daha irəli gedərək Komitə rəhbərliyini hansısa dayanacaq sahibini himayədarlıqda ittiham etməyin başqa izahı yoxdur və gömrük orqanları bu məsələdə tərəf deyil.

Gömrük orqanlarının pandemiya dövründəki fəaliyyətinə gəlincə isə virusun yayıldığı ilk gündən etibarən həyatlarını təhlükə qarşısında qoyan gömrükçülər həm beynəlxalq ticarətin davamlılığının təmin olunması, həm də əhalinin təhlükəsizliyinin qorunması istiqamətində bütün səylərini səfərbər edib və görülən işlər biznes dairələri və beynəxalq təşkilatlar tərəfindən təqdirlə qarşılanır. Ünvanını səhv salanların əsassız iddiaları isə görülən işlər qarşısında ağ yalandan başqa bir şey deyil".

Digər xəbərlər

Banner